Anganga Am Karea E Ngae Ngke Ko a Karawawataki Iai

“KAM kona n aranai bwa te tia bubutii te mwane, ma I aki tabe iai, bwa I bubutii ibukin Iesu.” Taeka aikai a nako mairoun te minita temanna n te Aro ni Borotetanti are e katereterea te kauntaeka ae irekereke ma aia karikirake taian Aro. N taraana, e aki kona n teimatoa aia waaki taian Aro, ma tii ngkana e bati aia karekemwane. A riai ni kabooaki taani mwakuri iai, a riai ni kateaki ma ni kateimatoaki taraaraoin taian tembora, ao a riai naba ni mwanenaki waaki ni kabuti rongorongo. A na reke iia mwaane aika tau ibukin waaki aikai?

A bati Aaro aika a karekea aia mwane man te kabwianibwai.a “Te kabwianibwai bon ana anga te Atua ibukin mwanenakin Ueana i aon te aba,” e taekina anne te tia kabuta te rongorongo ae arana Norman Robertson. “Bon ana waaki ni karikirake [te Atua] ibukin boutokaan kabutan te Euangkerio.” E aki wiimakiiki ni kauringia taan rimwina bwa a riai n angangabwai, ao e kamatoaa ana taeka ni kangai: ‘Te kabwianibwai bon tiaki te bwai ae ko karaoia ibukina bwa e tau am mwane nako iai. Ma, bon te mwakuri ae kaota am ongeaba. E urua ana tua te Atua [te aomata] ae e aki anga ana kabwianibwai. Ai aron ae e bon iraa iai.’​—Tithing​—God’s Financial Plan.

Tao ko kakoauaa bwa te angangabwai bon kanoan naba te taromauri ni Kristian. Ma e rau nanom n aia kairoro Aaro nakoia aomata bwa a na anganga aia mwane? Te tia rabakau n te Aro temanna i Brazil ae arana Inácio Strieder, e bukinia Aaro bwa a kabongana te kabwianibwai ibukin “kaetan kangaanga aika irekereke ma waakin aia botaki,” ao e arani waaki aikai bwa “a aki riai, a ribuaka, ao a aki boraoi ma nanon te Atua.” E taekinna naba bwa ibukin te waaki aei, “aomata aika akea aia mwakuri, aine ake a a tia ni mate buuia, aomata aika raarikin ao aomata aika a babanga ni babaire raoi, e kakoauaki ngkai bwa a a kakeaaki bongaia iroun te Atua. Ngaia are a a kairoroaki bwa a na angabwai nakon ‘aia mitinare’ n te mwaiti ae riao, n te aro are e a aki tau iai kanaia kaain aia utu.”

Tao ko kona n iangoa aei: ‘Te koaua bwa Aaro aika kabongana te kabwianibwai, a karaoa ae boraoi ma te Baibara? Bon iai naba Aaro tabeua ngkai aika a kakamaakuia aia aomata n tuangia bwa a na katuaeakaki iroun te Atua ngkana a aki kabatiaa aia karikirake ibukin mwanenakin te Aro? Te koaua bwa te Atua e tangirira bwa ti nang bon angangabwai nako naba, e ngae ngke ti karawawataki iai?’

[Kabwarabwara ae nano]