Aia Ribooti Taan Ua Rongorongo Ibukin Te Tautaeka N Uea
“I Kan Toro Iroun te Atua”
“AU AOMATA, kam na oti nako mai nanona.” Anne bon ana wewete te anera are e ongo te abotoro Ioane n te moan tienture C.E. I nanon ara bong aikai, mirion ma mirion mwaitiia aomata aika raoiroi nanoia ake a a tia ni butimwaea te wewete anne ma n otinako mai nanon “Baburon are kakanato,” ae te botaki n Aro ae kewe ae katobibia te aonnaba. (Te Kaotioti 18:1-4) Temanna mai buakoia bon Wilner mai Haiti, are e taekina rongorongona aei:
“I bungiaki n te ririki ae 1956 man te utu ae e rangi ni matoatoa n te Aro ni Katorika, ni kaawan Haiti ae uarereke ae St. Marc. Iangoa aron kimwareireia kaain au utu ngke I a reke n te rinerine ma uoman riki raou man ara kaawa bwa ti na rin n te kuura n tama i St Michel de l’Atalaye, i Haiti. Ao n te ririki ae 1980, ti a manga kanakoaki nako Stavelot, i Belgium, ibukin ara kataneiai riki tabeua. Ikanne are ti a rin iai n ana kuura ae rietata te Aro ni Katorika.
“I bon rangi ni kimwareirei n te moan tai ngke N nang riki bwa te berebitero. N te bong teuana i nanon te ruu are ti kakatawanou iai, e tuangai te berebitero are e mataniwi n ara kurubu, bwa N na tiku imwin nakoia aomata bwa iai te bwai ae e kan tuangai. Ai kubanrou ra ngai ngke e a tii tuangai naba bwa e taatanai! I karautaeka nakoina ao I a rangi n aki rauaki n te mwakuri aei. I kororeta nakoia au utu ibukin te bwai are riki ao I kitana te kuura n tama tabeua te namwakaina imwina, e ngae ngke a aki kukurei iai au utu. I karekea au tabo ni maeka n te kaawa ao I a manga kataneiai ibukin te mwakuri riki teuana.
“Ngke I a okira St. Marc, ai bon akea onimakinan te Aro ni Katorika irou. Ma, I bon teimatoa naba ni kan toro iroun te Atua, ma I a aki ataa te bwai ae N na karaoia. I nakon te Aro ae te Itibong, te Aro ae te Ebenezer, ao ai te Momon. I a bon tiotio nako ni kaineti ma bwaai n taamnei.
“Imwina riki I a uringnga bwa ngke I reirei ngkoa n te kuura n tama i Belgium, ao I wawareware n te Baibara ae te Crampon, ao I a tia ni kunea i nanona bwa iai aran te Atua. Mangaia are I a kakabongana arana ma ni kakorakorai n tataro nakoina bwa e na buokai ni kaota te Aro ae koaua nakoiu.
“E bon aki rangi ni maan imwin anne, ao a a roko naba ana Tia Kakoaua Iehova aika uoman ni maeka n uakaan ma te tabo are I maeka iai. A maiuakina te rau ao te karinerine, ao a kakaraoa ae riai. E anaaki nanou irouia. N te bong teuana, e kaoai temanna mai buakoia taani Kakoaua aikai, bwa N na kaea Kauringan maten Kristo are e kakaraoaki ni katoa ririki. I rangi ni kukurei ni bwaai aika karaoaki n te botaki anne, ao I kariaia bwa taani Kakoaua a na katoa tai n reirei ma ngai n te Baibara. Tao bon onoua te namwakaina imwina, ao e a moti au iango bwa ai bon aio te kawai ae eti ibukin te toro iroun te Atua. Ngaia are I a katabua maiu nakon Iehova ao I a babetitoaki n Nobembwa 20 1988.”
Mai mwin anne, e a kabwanina ana tai Wilner ni beku ibukin te Atua. Bon te unimwaane n te ekaretia ngkai, ao ngaia ma buna ao natiia aika uoman a kukurei n aia beku ma kaain te ekaretia.
[Taamnei n iteraniba 9]
Rinanon warekan te Baibara, Wilner, e a kunea bwa aran te Atua bon Iehova