Kaotiota Te Nano Ni Kakaantaninga!
“N na kaantaninga Atuani maiuu: E na ongo i rou Atuau.”—Mika 7:7.
1, 2. (a) Ibukin nanoia ae kairua, a kanga n rootaki buaka I-Iteraera ngke a mena n te rereua? (b) Tera ae e kona n riki nakon te Kristian ae e aki karikirakea te nano ae raoiroi irouna?
A BONI bati bwaai n te maiu aei aika a kona n iangoaki bwa a raoiroi ke a aki-raoiroi, ni kaineti ma oin nanora ibukin taraakin bwaai aikai. Ngke a mena n te rereua tibun Iteraera, a anganaki te manna n te kakai. E riai riki ngke a taratara te rereua are akea arokana are a mena iai, ma n rangi ni kakaitau nakon Iehova ibukina bwa e kakatauraoi kanaia. Ngke arona bwa a karaoa anne, ao a na kaota iai te nano ae raoiroi. A aki karaoa anne, ma a ururinga te amwarake ae rangi ni bati aekakina i Aikubita rimoa, ao a ngureakina te manna n taku bwa e aki kangkang. Ai aki-raoiroira nanoia ake a kaotiotii n te tai arei!—Warekaia Iteraera 11:4-6.
2 Nanon te Kristian ae maiu ngkai e kona ni kairia bwa e na tarai bwaai bwa a raoiroi ke a kananokawaki. Ngkana akea te nano ae riai irouna, ao e kai bua ana kimwareirei te Kristian, ae te bwai ae rangi ni karuanikai n aron are e taekinna Neemia: “Boni korakora[ra] kimareirei[ara] iroun Iehova.” (Neemia 8:10) Te nano ae raoiroi ae kimwareirei, e buokira ni kateimatoa korakorara, ao e karikirakea te rau ao te katiteuanaki inanon te ekaretia.—I-Rom 15:13; I-Biribi 1:25.
3. E a kanga te nano ae riai, ni buoka Ieremia n te tai ae kangaanga?
3 E kaotiota te nano ae raoiroi Ieremia e ngae ngke e maiu n te tai ae kangaanga. E ngae ngke e nori bwaai aika kakamaaku ake a riki ni bwakan Ierutarem n 607 B.C.E., ma e nori naba bwaai aika raraoi aika a na riki. E na aki mwanuokina taekan Iteraera Iehova, ao e na boni kamaiuaki te botannaomata. E korea ae kangai Ieremia n te boki ae Baebaeti: “Ngkai iai ana atataiaomata Iehova, ao ti aki kamaunaki, ba kioina ngkai a aki toki ana nanoanga. Bon ngkainaba am nanoanga n te ingabong ae koraki; e ababaki am kakaonimaki.” (Baebaeti 3:22, 23) Man ngkekei ni karokoa ngkai, ana toro te Atua ake a rinanon kangaanga aika rangi ni korakora, a kataia ni kateimatoa nanoia aika raoiroi ma ni kimwareirei.—2 I-Korinto 7:4; 1 I-Tetaronike 1:6; Iakobo 1:2.
4. Tera nanon Iesu are e kakawakinna inanona, ao e a kanga ni buokaki iai?
4 Onobubua te ririki imwin Ieremia, e buokaki Iesu bwa e na nanomwaaka, n nanona ae raoiroi. Ti wareka ae kangai: “[Iesu e] taona nanona nakon te kaibangaki i bukin te kimareirei are kamenaki i mwaina, ao E aki mutiakina kamaamaeana, ao E tekateka i angaatain ana kaintokanuea te Atua.” (Ebera 12:2) E ngae ngke e kaitara te riribai ke te bainikirinaki Iesu—n ikotaki ma te maraki ae korakora i aon te kai-ni-kammaraki—ma e katuua ana iango i aon “te kimareirei are kamenaki i mwaina.” Te kimwareirei aei bon te kakabwaia are e anganaki ae te kona ni kaotiota riain Iehova n tautaeka, ao katabuan arana, n ikotaki naba ma kaantaningan ae n te tai ae e na roko, e na karekei kakabwaia aika mwaiti nakoia aomata aika a ongeaba.
Bwaina te Nano ni Kakaantaninga
5. Tera te katoto teuana are e kaota aron te nano ni kakaantaninga ni kona ni buokira n iangoi bwaai n te aro ae riai?
5 Ngkana ti karikirakea te nano ae ai aron nanon Iesu, e na aki bua ara kimwareirei iroun Iehova, e ngae ngkana bwaai tabeua a aki riki n te tai ao n aron are ti kaantaningai bwa a na riki iai. E kangai te burabeti are Mika: “Ao ngai, N na kariaria Iehova; N na kaantaninga Atuani maiuu.” (Mika 7:7; Baebaeti 3:21) Ngaira naba ti kona ni kaotiota te nano ni kakaantaninga. N te aro ra? N aaro aika mwaiti. N te katoto teuana, ti kona n taku bwa te tari temanna ae iai irouna te mwiokoaki teuana, e karaoa te kairua, ao e riai ni waekoa ni kaetaki taekana. Te nano ni kakaantaninga e na kariaira bwa ti na iango n aron ae, ‘Te koaua bwa e boni kairua iai, ke e bure au taratara? Ngkana e boni kairua iai, ao e kona n riki ae Iehova e kariaia moa waakinan anne ibukina bwa E taku bwa e na kekeiaki riki teuarei, ao e na aki kainnanoaki iai te kaetieti ae matoatoa?’
6. E na kanga te nano ni kakaantaninga ni buoka te aomata are e taonaki n te kangaanga teuana?
6 E kona ni kainnanoaki te nano ni kakaantaninga, ngkana a aki rau nanora ibukin te kangaanga teuana ae ti taonaki iai, ke ti a tabe ni kekeiaki n tokanikai i aon mamaarara teuana. Tao ti butiia Iehova bwa e na buokira, ma e bon reita nako te kangaanga. Tera ngkanne ae ti na karaoia? Ti riai n teimatoa ni karaoa ara kabanea ni kona, ni kaeta te kangaanga aei, ao ngkanne, ti na onimakina ana taeka Iesu aikai: “Bubuti, ao kam na anganaki; ukeuke, ao kam na karereke; karebwerebwe ao e na kaukaki nako imi.” (Ruka 11:9) Tatataro ma ni kakaantaninga Iehova. N te tai ae riai, ao n te aro are e boraoi ma nanona, e na boni kaeka am tataro Iehova.—1 I-Tetaronike 5:17.
7. E na kanga te nano ni kakaantaninga ni buokira ni bwaina te iango ae riai ni kaineti ma kaetan otara i aon te Baibara?
7 Ngkana a tabe ni kakoroaki bukin taetae ni burabeti man te Baibara, ao e kamataataki riki otara i aon te Baibara. N taai tabetai, ti kona n taku bwa e a rangi n rimwi kaetan otara i aon te bwai teuana. Ti kukurei n tataninga moa, ngkana e aki reke n te tai are ti tangiria? Uringnga bwa Iehova e nora riain kaotiotan “ana bwai Iesu ae raba,” teutana imwin teutana, ae inanon te maan ae 4,000 tabun te ririki. (I-Ebeto 3:3-6) Mangaia are iai bukina ae ti na aki taotaona nanora? Ti nanououa n ae e a tia ni kateaki te “toro ae kakaonimaki ae wanawana” bwa e na kaamwarakeia ana aomata Iehova ni ‘kanaia n te tai ae riai’? (Mataio 24:45) Bukin tera bwa ti na kakea kimwareireira iroun te Atua ibukina bwa a aki ataaki nanoni bwaai ni kabane? Uringnga bwa bon Iehova are e bairea te tai ao te aro ae e na kaotii iai “nanona ae raba.”—Amota 3:7.
8. E a kanga ana taotaonaki n nano Iehova ni buokia aomata aika mwaiti?
8 A kona ni bwara nanoia aomata tabeman, ibukina bwa a taku bwa e ngae ngkai a a tia ni kakaonimaki ni beku inanon ririki aika mwaiti, ma tao a na mate imwain rokon “ana bong Iehova are kakanato are kakamaku.” (Ioera 2:30, 31) Ma a kona n unga nanoia ngkana a iangoa anne n iterana ae raoiroi. E reirei ni kangai Betero: “Kam na taku ba kamaiuami taotaonan nanon ara Uea.” (2 Betero 3:15) Ana taotaonakin nano Iehova e a kariaia aomata aika raraoi nanoia aika mirion ma mirion mwaitiia, bwa a na reiakina taekan te koaua. Tiaki te bwai ae moan te raoiroi aei? Ao irarikin anne, ngkana e maan riki Iehova n taotaona nanona, ao e a mwaiti riki ara tai iai ni ‘mwamwakuri kamaiuara ni maku ma n ruru.’—I-Biribi 2:12; 2 Betero 3:11, 12.
9. Ngkana e uarereke ara konabwai ni beku iroun Iehova, e na kanga te nano ni kakaantaninga ni buokira n nanomwaaka iai?
9 Te nano ni kakaantaninga e buokira n te aro ae a na aki bwara nanora ngkana e a roko te bainikirinaki, te aoraki, te kara, ke kangaanga tabeua riki aika a tukira man ara beku ibukin te Tautaeka n Uea. Iehova, e kaantaningaira bwa ti na beku irouna ma nanora ni kabane. (I-Rom 12:1) Ma Natin te Atua, are e “nanoangaiia akana mamara ma akana a kai nanoia,” e aki tuatua bwa ti na karaoa ae riaon ae ti kona ni karaoia; e aki naba karaoa anne Iehova. (Taian Areru 72:13) Mangaia are ti a kaungaki bwa ti na karaoa are ti konaa, ma n taotaona nanora ni kakaantaninga bitakin arora—are tao n te maiu aei, ke n te aonnaba ae e na roko. Uringnga: “E aki ribuaka te Atua ni manuoki ami makuri ma ami tangira are kam kaotia nakon arana, ngke kam akoiia ake a itiaki, ao ngkai kam boni kume naba n akoiia.”—Ebera 6:10.
10. Tera te aroaro ae bobuaka ma aron te Atua ae e kona ni kararoaki ngkana e bwainaki te nano ni kakaantaninga? Kabwarabwara.
10 Te nano ni kakaantaninga e buokira naba ni kararoa te kainikatonga. Tabeman ake a a tia ni kitana ma ni kabwaoua te koaua a rawa n tataninga. Tao a taku bwa a kainnanoaki kaetan bwaai tabeua, tao n otara i aon te Baibara ke n aron babaire tabeua inanon te botaki. Ma a aikoa kariaia ae taamnein Iehova e kaira te toro ae kakaonimaki ae wanawana bwa e na karaoi bitaki n te tai are E baireia, ao tiaki n te tai are ti bon taku bwa e riai. Ao bitaki ake a karaoaki a riai ni boraoi ma nanon Iehova, ao tiaki oin ara iango. Akana a a tia ni kitana ma ni kabwaoua te koaua a kariaia te kainikatonga bwa e na kabwaoua aia iango ma ni kabwakaiia. Ma ngke arona bwa a nanona nanon Kristo, e na aki bua kimwareireiia, ao a na tiku ni mena ibuakoia ana aomata Iehova.—I-Biribi 2:5-8.
11. Ti na kanga ni kona ni kabongana te tai ae ti kakaantaninga iai n te aro ae riai, ao karaoan anne e na katotonga aia katoto antai?
11 Te koaua bwa bwainan te nano ni kakaantaninga, e aki nanona bwainan te tataningaroti ke te aki-mwamwakuri. Bon iai tabera ae ti riai ni waakinna. N te katoto teuana, ti riai ni katabeira n te reirei n te Baibara ibon iroura, ma ni kaota iai tabeakinan bwaai n taamnei, n aroia naba burabeti ake a kakaonimaki ao anera rimoa. Tabeakinan bwaai aikai irouia e taekinaki iroun Betero ngke e kangai: “Ao burabeti ake a taetae ni burabeti ni kaota te akoi ae na roko i roumi a kakorakoraia n ukoukora aron te maiu aei, ao a neneria . . . aika baika a kan taratarai anera.” (1 Betero 1:10-12) Tiaki tii te reirei ibon iroura ae e riai ni karaoaki, ma e riai naba te kakaonimaki ni kaei botaki, ao te tatataro. (Iakobo 4:8) Akana a kaota ataakin kainnanoakin bwaai n taamnei irouia n te aro ae a kakarin amwarake n taamnei ao a iraorao ma raoia ni Kristian, a kaotia bwa a a tia ni bwaina nanon Kristo.—Mataio 5:3.
Kaotia bwa Ko Ataa Bukin Rikin Kangaanga
12. (a) Tera te inaaomata are e tangiraki iroun Atam ao Nei Ewa? (b) Tera mwiin katotongan aroia Atam ao Nei Ewa, iroun te botannaomata?
12 Ngke e karikiia te moan taanga n aomata, te Atua e taua mwaakana ni katei kaetieti nakoia ibukin ae eti ao ae bure. (Karikani Bwaai 2:16, 17) Atam ma Nei Ewa a tangira inaaomataia man kairakiia iroun te Atua, ao aroia anne e karika te aonnaba ae ti noria ngkai. E kangai te abotoro Bauro: “Ma ngaia aei, ba ai aron rokon te bure i aon te aba iroun te aomata ae ti temanna, ma rokon te mate n te bure; ao e ituia aomata ni kabaneia te mate n te aro aei, ba a bane ni bure.” (I-Rom 5:12) Rongorongon aia waaki aomata inanon onoua tenga te ririki ni moa man ana tai Atam, e a tia ni kaota koauan ana taeka Ieremia aikai: “Iehova, I ata kawain te aomata ba e aki mena i nanona: tiaki ana bwai te aomata ae nakonako te kaeti eueutakina.” (Ieremia 10:23) Tiaki nanona bwa ko a kabwara nanom iai ngkana ko kariaia koauan ana taeka Ieremia aikai. Ma e tii kaotia bwa ko na atai raoi bukin rikin kangaanga. Ataakin aei e kabwarabwara bukina ae inanon tienture aika mwaiti, “e taua aron te aomata temanna te aomata temanna ni karekea oini kaina iai,” ibukina bwa aomata a kataia n taua taekaia ibon irouia, n aki tangira kairaia iroun te Atua.—Te Minita 8:9.
13. Tera te iango ae riai are e bwainaki irouia Ana Tia Kakoaua Iehova ni kaineti ma aia kona aomata ni karaoi bwaai?
13 Ibukin aron te botannaomata ae ngkai, Ana Tia Kakoaua Iehova a ataia bwa iai tian bitaki ake a kona ni karaoaki ibukin katamaroan te waaki i aon te aonnaba ae ngkai. Te nano ae raoiroi e kona ni kateimatoa kimwareireira, ma e aki kona ni katoki kangaanga ni kabane. N 1950 tabun, te mataniwi n Aro temanna i Amerika e boretia te boki ae tatangiraki ae atuna ae The Power of Positive Thinking. Te boki aei e taekinna bwa aongkoa e kona n tokanikai te aba i aon bwaai n tutuki ni kabane, ngkana a kaitaraki kangaanga aikai ma te nano ae raoiroi. Bon te bwai ae riai naba bwainan te nano ae raoiroi. Ma bwaai aika riiriki, a kaotia bwa bwaai ake ti kona ni karaoi a katautauaki n aron buburan ara atatai, rabakaura, kaubwaira, ao ni bwaai aika mwaiti riki. Ao ngkana e iangoaki te aonnaba ni kabuta, a rangi ni korakora riki kangaanga aika noraki, nakon ae a kona ni kaetaki irouia aomata—e ngae ngkana a rangi n raraoi aron aia iango!
14. Te koaua bwa a aki raoiroi aia kaantaninga Ana Tia Kakoaua Iehova? Kabwarabwara.
14 Ibukin aroia ni kaotia bwa a ota raoi n aron bukin rikin kangaanga aikai, Ana Tia Kakoaua Iehova a kona ni bukinaki n atongaki bwa a aki-raoiroi nanoia. Ni koauana, a ingainga nanoia ni kan kaongoia aomata taekan Teuare are iai irouna n tii ngaia te kona ni katamaroa aron te botannaomata. A katotonga naba nanon Kristo iai. (I-Rom 15:2) Ao a tabetabe ngkai ni buokia aomata bwa a na karekea aia iraorao ae raoiroi ma te Atua. A ataia bwa n tokina, bon karaoan anne ae e na karekea ae te kabanea n raoiroi.—Mataio 28:19, 20; 1 Timoteo 4:16.
15. E a kanga aia mwakuri Ana Tia Kakoaua Iehova ni katamaroa riki aroaroia aomata?
15 Ana Tia Kakoaua Iehova a aki kaini mataia nakon kangaangan te natannaomata—ao e moamoa riki bwaai aika kamwara aika a bobuaka ma te Baibara ake a kakaraoaki—irarikiia. Imwain ae e na riki bwa kaain Ana Tia Kakoaua Iehova, te aomata ae nano iai, e na karaoi moa bitaki aika riai, ao n angiin te tai, e riai moa n tokanikai i aon mwaan aika buakaka aika a taua aron te aomata, ao a aki kakukureia nanon te Atua. (1 I-Korinto 6:9-11) Mangaia are Ana Tia Kakoaua Iehova a a tia ni buokia aomata aika a kani buokaki, bwa a na tokanikai i aon te mamanging, tautoronakia n taian drug, te wene ni bure, ao aorakia ae takaakaroakinan te mwane. Aomata ake a buokaki aikai, a a tia n reiakinaki aron karekean bwaai aika a kainnanoaki irouia kaain aia utu n te aro ae riai, n akea te babakanikawai iai. (1 Timoteo 5:8) Ngkana a buokaki aomata ao utu n te itera aei, a kauarerekeaki riki kangaanga ake a riki ibuakon te natannaomata—a uarereke riki mwaitiia aomata ake a tautoronaki n taian drug, e uarereke riki te iowawa n te utu, ao bwaai n aron akanne. Kioina ngkai Ana Tia Kakoaua Iehova bon aomata aika a mutiakini tuan te aba ao ibukina bwa a buokia aomata tabemwaang bwa a na bitii maiuia nakon ae raoiroi riki, Ana Tia Kakoaua Iehova a kabebetea tabeia botaki ni mwakuri ake a bukinaki bwa a na kaetii aia kangaanga te natannaomata aikai.
16. Bukin tera bwa Ana Tia Kakoaua Iehova a aki irekereke ma aia waaki aomata ibukin kaetan ana kangaanga te natannaomata?
16 Mangaia are, a a tia Ana Tia Kakoaua Iehova ni bita aroaroni maiuiia kaain te aonnaba? Inanon ririki ake tebwina ake a a tibwa nako, mwaitiia taani Kakoaua e a rikirake man te mwaiti ae i aan 3,800,000, nakon te mwaiti ae kaania 6,000,000. Anne bon te kerake n te mwaiti ae tao 2,200,000, ao a mwaiti ibuakoia aomata aikai ake a kakeai mwakuri aika bubuaka ngke a riki bwa Kristian. A katamaroaki iai maiuiia aomata aika mwaiti! Ma e ngae n anne, e rangi n uarereke te mwaiti aei ngkana e kabotauaki ma keraken mwaitiia kaain te aonnaba inanon te maan anne—ae 875,000,000! Ana Tia Kakoaua Iehova a kimwareirei ni buokia aomata aika a tangira buokaia, e ngae ngkai a ataia bwa bon tii tabeman aomata ake a na toua te kawai nakon te maiu. (Mataio 7:13, 14) Ngkai taani Kakoaua a tabe ni kaantaninga rokon bitaki aika raoiroi nakon te aonnaba aika a tii kona ni karaoaki iroun te Atua, ao ibukin anne a aki irekereke ma aia waaki aomata ibukin kaetan kangaanga, ake a boto i aon naano aika raraoi n te moan tai, ma a karika te bwara n nano ao ai te tiritiri.—2 Betero 3:13.
17. Tera are e karaoia Iesu ibukin buokaia aomata ake irarikina, ao tera are e aki karaoia?
17 N aroia aei, Ana Tia Kakoaua Iehova a kaotiota onimakinan Iehova n aron are e karaoia Iesu ngke e mena i aon te aonnaba. N te moan tienture, Iesu e kamaiui aoraki n te kakai. (Ruka 6:17-19) E boni kautiia naba maate. (Ruka 7:11-15; 8:49-56) Ma e aki katoka te kangaanga ae riirikin te aoraki, ao e aki tokanikai i aon te kairiribai ae te mate. E ataia bwa e tuai man roko ana tai te Atua ibukin karaoan anne. E bubura ana konabwai Iesu kioina ngkai e kororaoi ngaia, ao ngkanne e bati ana ibuobuoki are e kona ni karaoia ibukin katokan kangaanga aika korakora ake a rootiia tautaeka ao aomata. N taraana, aomata tabeman n te tai arei a tangira Iesu bwa e na riki bwa te tia tautaeka ma ni karaoi mwakuri ae ai aron aikai, ma e rawa iai Iesu. Ti wareka ae kangai: “Ma ngaia are, ngke a nora te kakai are E karaoia Iesu aomata akekei, ao a taku, Ai boni Ngaia te burabeti are nangi roko i aon te aba. Ma ngaia arei, ngke E ataiia Iesu ba a kan roko n taua ni kauea, ao E a manga oki nako n te maunga, n ti Ngaia.”—Ioane 6:14, 15.
18. (a) E a kanga Iesu ni kakaota te nano ni kakaantaninga n taai nako? (b) Tera te bitaki n aron ana mwakuri Iesu ni moa man 1914?
18 E rawa Iesu n irekereke ma te waaki n tautaeka ke ni kabanea ana tai n tii buokiia aomata aika a kainnano, ibukina bwa e ataia bwa e tuai n roko te tai are e na uea ma ni kamaiuia aomata ni kabane n taabo nako. Ao imwin waerakena nako karawa nakon te maiu n taamnei are te aki-mamate, e a kukurei naba ni manga tataninga rokon te tai ae baireaki iroun Iehova, imwain waakinan ana mwakuri. (Taian Areru 110:1; Mwakuri 2:34, 35) Ma ngke e kaueaki bwa te Uea n ana Tautaeka n Uea te Atua n 1914, e a tabe n “oti nako n tokanikai, ao ba e na bon tokanikai.” (Te Kaotioti 6:2; 12:10) Ai kukureira ngaira n aantaeka nakon ueana aei, e ngae ngkai aomata tabeman ake a taku bwa Kristian ngaiia a motiki nanoia bwa a na aki ataa taekan ana reirei te Baibara ibukin te Tautaeka n Uea!
Te Tataninga—E Karika te Bwara n Nano, ke te Kimwareirei?
19. N ningai te tai are te ‘kakaantaninga e katoka te nano,’ ao n ningai te tai are e na karika te kimwareirei?
19 E ataia Toromon bwa tataningan rokon te bwai teuana n te tai ae maan e kona ni kabwara te nano. E korea ae kangai: “E a toki te nano ngkana e a maan kaantaningan ae tangiraki.” (Taeka N Rabakau 13:12) Te koaua bwa ngkana te aomata e kaantaninga te bwai teuana ma akea bukin ana kaantaninga, ao e kona ni karawawataki nanona ngkana e maneang iai. Ma kaantaningan rokon te bwai ae kakukurei—tao n aron te mare, bungiakin te tei, ke te manga kaitiboo ma aomata ake ti tangiriia—e kona ni kaonira n te kimwareirei ae bati e ngae ngkana e raroa kakoroan bukin ae kaantaningaki. E kakorakoraki riki te kimwareirei iai ngkana ti kabongana raoi te tai n tataninga n te aro ae ti katauraoi ibukin rokon te bwai ae kaantaningaki.
20. (a) Baikara mwakuri aika kamimi aika ti kakaantaningai, n akea te nanououa iai? (b) Ti na kanga ni kimwareirei ngkai ti kakaantaninga kakoroan bukin ana kaantaninga Iehova?
20 Ngkana ti kakoaua raoi bwa a na boni koro bukin baika ti kaantaningai—e ngae ngkana ti aki ataia bwa n ningai te tai are a na koro bukiia—e na aki ‘katoki nano’ te tai are ti riai n tataninga iai. Taan taromauria te Atua aika kakaonimaki a ataia bwa e nang roko ana Tautaeka Kristo ae Maanna Tenga te Ririki. A onimakinna ae a na nora tokin te mate ao aoraki aika kamamate. A kimwareirei ngkai a ingainga nanoia ni kaantaninga te tai are a na butimwaia aomata aika birion ma birion mwaitiia ake a na kautaki man te mate, n ikotaki naba ma aomata ake a tangiraki irouia ake a a tia ni mate. (Te Kaotioti 20:1-3, 6; 21:3, 4) Inanon taai aikai are e korakora uruan ana otabwanin te aonnaba, a ingainga nanoia ni kan nora katean te Baretaiti i aon te aonnaba. (Itaia 35:1, 2, 7) Ai raoiroira ngkanne kabonganan te tai n tataninga imwain anne, n te aro ae raoiroi, ae ti na aki ‘toki ni kakorakoraira n ana mwakuri te Uea’! (1 I-Korinto 15:58) Teimatoa ni kakarina te amwarake n taamnei. Kakorakora riki am iraorao ma Iehova. Reitiko ma aomata aika a kairaki naba n oin nanoia ni kan beku iroun Iehova. Kaungai nanoia raoraom n onimaki. Kabongana raoi nikiran te tai are kariaiakaki iroun Iehova. Ao ngkanne, kakaantaningan Iehova e na aki ‘katoka nanom.’ Ma e na kaoniko n te kimwareirei!
Ko Kona ni Kabwarabwara?
• E a kanga Iesu ni kaotiota te nano ni kakaantaninga?
• N ningai taai tabeua are Kristian a riai ni kaota te nano ni kakaantaninga?
• Bukin tera ngkai Ana Tia Kakoaua Iehova a kukurei ni kakaantaninga ibukin Iehova?
• E na kanga kakaantaningan Iehova n riki bwa te bwai ae kakukurei?