E Kairiri te Un Nakon te Tiritiri

Imwini kitanan te onnaroka are i Eten iroun Atam ao Ewa, a a karikiia natiia aika bati. Aia karimoa boni Kain, are riki bwa te tia ununiki, ao aia kauoman bon Abera, are riki bwa te tia kawakinia maan.

N te bong teuana ao a angakarea nakon Iehova Kain ma Abera. Ko ataia bwa tera te karea? Bon te bwaintangira ae okoro. E kukurei Iehova n ana karea Abera, ma e aki kukurei n ana karea Kain. Aio are e a rangi n un iai Kain. E anga ana kauring Iehova nakoni Kain bwa e kona ni kairia unna nakoni karaoan ae buakaka. Ma e aki kan ongo Kain.

Ao e taku Kain nakon Abera: “Ti a nako n te tawaana.” Ngke ai tii ngaiia n te tawaana, e a eweka tarina Kain ao e tiringnga. Tera ae e karaoia Iehova ibukin aei? E katuuaaea Kain ao e kakionakoa mairouia ana utu. E bon aki kariaiakaki bwa e na manga oki.

Tera reireiara iai? Ti kona n un ngkana a aki nakoraoi bwaai n aron ae ti kantaningaia. Ngkana ti namakina ae e a rikirake te un i nanora, ke ngkana ti anganaki te kauring irouia tabemwaang bwa a ataia ae ti un, ti riai ni waekoa ni bitii arora ao n taotaon nanora imwain ae ti taonakinako iai.

Ibukina bwa e tangira Iehova Abera ao e karaoa ae eti, e na teimatoa n uringaki iroun Iehova. E na kauta Abera te Atua ngkana e a karika te aonnaba aei bwa te bwaretaiti.