A Aki Ongeaba Atam ma Ewa Iroun te Atua

N te bong teuana ngke e tiku n tii ngaia Ewa, ao e a taetae te naeta nakoina ni kangai: ‘Te koaua ae e aki kariaia te Atua bwa kam na amwarake mani kaai aikai ni kabane?’ E taku Ewa: ‘Ti kona n amwarake mani kaai ni kabane ma tii teuana ae ti na aki amwarake mai iai. Ngkana ti kana uaana, ti na boni mate.’ E taku te naeta: ‘Kam na aki mate. Ngkana kam boni kanna, kam na riki bwa ai aron te Atua.’ E koaua anne? E aki, bon te kewe. Ma e kakoauaa Ewa. Ngke e tataraa uaan te kai arei Ewa, e a anaaki riki nanona iai. E kana uaan te kai ao e angan naba Atam. E ataia teuaei ae a na mate ngkana a aki ongeaba iroun te Atua. Ma e boni kanna naba.

Imwina riki n te bong anne, e a taetae Iehova nakon Atam ma Ewa. E titirakinia bwa e aera ngkai a aki ongeaba irouna. E bukina te naeta Ewa, ao Atam e bukina Ewa. Ibukina bwa a aki ongeaba Atam ma Ewa iroun Iehova, e a kaotinakoia man te onnaroka. E taraia raoi bwa a na aki manga okiria, ngaia are e katikuia anera ni mataroana ma te kabaang ae ura n te ai.

E taekinna Iehova bwa e na katuuaaeaki naba teuare kewe nakon Ewa. Bon tiaki raoi te naeta ae taetae nakon Ewa. E aki karikiia naeta Iehova bwa a na kona n taetae. Bon te anera ae buakaka are e karika te naeta bwa e na taetae. E karaoa aei ni kamwanea iai Ewa. Aran te anera anne bon Tatan te Riaboro. N te tai ae e na roko, e na kamaunaaki Tatan iroun Iehova bwa e aonga n aki teimatoa ni kamwaneia aomata bwa a na karaoi baika buakaka.