TITIRAKI 5

Tera Arou Ngkana Iai ae E Kakani Maiubuaka Nakoiu n te Reirei?

BUKINI KAKAWAKINA

Arom iai e kona ni kanakoraoa riki te kangaanga, ke ni kakorakoraa.

TERA AE KO NA KARAOIA?

Iangoa te bwai ae riki aei: E a aki kan nako n reirei Thomas n te bong aei, ke ningabong, ke rimwi riki. E riki aei tenua te namwakaina n nako ngke a kabutii taekana aika rangi ni buakaka raona n reirei. Imwina, a a weweteia n aara ni kaenaena. N tabetai, iai ae e kabwakai ana boki Thomas mai baina ao aongkoa tiaki nanona, ke tao iai aika mena i akuna ao e ineakinna temanna, ma ngkana e tanrikaaki Thomas, e a aki ataia bwa antai. Ngkoananoa, e a roko riki ni korakorana bwa e a kakamaakaki Thomas i aon te intanete . . .

Ngke arona bwa Thomas ngkoe, tera arom iai?

TEEI MOA AO IANGO!

Tiaki nanona bwa ai bon akea te bae ko kona ni karaoia! Ko boni kona ni kaitaraa ane e kakani maiubuaka nakoim n aki un. N te aro raa?

TAI UN. E kangai te Baibara: “E kaotiotii ana namakin ni kabane te aomata ae nanobaba, ma e teimatoa n rau te aomata ae wanawana.” (Taeka N Rabakau 29:11) Ngkana ko teimatoa n aki un ao n aki taraa n un, ane a na bwara nanoia taani kakani maiubuaka.
TAI KABOOA MWIN TE BUAKAKA. E kangai te Baibara: “Tai kabooa ana buakaka te aomata n te buakaka.” (I-Rom 12:17) E na kakorakoraa riki te kangaanga ukeran ae ko na kataea kaim.
KARAROAKO MAN TE KANGAANGA. E kangai te Baibara: “E nora te kabuanibwai ane e ataibwai ao e karabaa.” (Taeka N Rabakau 22:3) Kabanea am konaa ni kararoaia naake a na karekea te kangaanga, ao taabo ake a kona ni kumeiko iai naake a kakani maiubuaka.
KAEKA N ARON AE AKI KANTANINGAAKI. E kangai te Baibara: “E rairaanako te un ae korakora te kaeka ae nimamannei.” (Taeka N Rabakau 15:1) Kataia ni karaoia n te kamanga. N te katoto, ngkana e taku ane e kakani maiubuaka bwa ko kaububura, ko kona ni kakuia angam ao ni kangai, “Eng, tao I a riai ni kabwakaa rawawatau!”
KAMWAAWAKO. E taku Nora ae 19 ana ririki: “Ngkana ko kainabwabu ko kaotia bwa ko ikawai ao ni korakora riki nakon ane e kumeiko. E oti n anne bwa iai iroum te taotaonakinnano ae akea iroun ane e kakani maiubuaka.”—2 Timoteo 2:24.
KAOTIA BWA KO KONABWAI. A kona taani kakani maiubuaka ni kinaia te koraki ake a iangoiia i bon irouia bwa akea bongaia, ao a aki kona ni bon tei ibukia. Ni kaitaraan anne, a bati aika kakani maiubuaka ake a na kerikaaki ngkana a ataia bwa akea korakoraia i aom.
KAONGOA TEMANNA. E taku temanna ae te tia reirei mai mwaina: “I kakaungaa ane e kakani maiubuaka te aba nakoina bwa e na taetae. Bon te bwai ae eti ae riai ni karaoaki, ao e kona ni kamanoia ake tabeman mai iai.”

Te teinimwaane ae kaotia bwa e konabwai ao e kaitaraa te tia kakani maiubuaka — Kaotiotan ae ko konabwai e kona n anganiko te korakora ae akea iroun ane e kakani maiubuaka

KO ATAIA?

Irarikin ae a boni kumeiko taani kakani maiubuaka, e irekereke naba aroia ma:

Taetae aika kammaraki. “I aki kona ni mwaninga arau ake a weweteai iai ke baike a taekin. A karikai bwa N na namakina ae akea bongau, I aki tangiraki, ao akea te bwai ae I rabakau iai. E raoiroi riki ngke e bwata matau.”—Celine, 20.
Katebeam. “A a moanna raou n reirei ni kakararoaai. A karaoa te aro ae e na taraa n akea nneu n tekateka n tain te katawanou, bwa I aonga n aki tekateka i rarikia. E bwanin au ririki n taatang ao n amwamwarake n tii ngai.”—Haley, 18.
Kabutan taekam n te intanete. “Arom n taibin taeka tabeua n te kaombiuta ko a kona iai ni kabuakakaa taekan temanna n urua arona, ke boni maiuna. E taraa ni kamimi aei, ma e boni koaua!”—Taniera, 14.

**TITIRAKI I AON TE KAKANI MAIUBUAKA**
KOAUA KE KEWE	KAEKA
1 E a kamani bwainaki te kakani maiubuaka i nanoni nga ma nga te ririki.	1 Koaua. N te katoto, a taekinaki n te Baibara taian Nebirim aika aomata ae nanon araia “Taani Kabwakaia Aomata.”—Karikani Bwaai 6:4.
2 Te kakani maiubuaka bon tii te kangongoo ae akea nanona. Akea te kangaanga iai.	2 Kewe. Te waaki ni kakani maiubuaka e a tia ni kairiia naba rooro n rikirake aika bati bwa a na bakabureiia.
3 Te anga ae moan te raoiroi ibukini katokaia aika kakani maiubuaka bon tii te un ma ngaiia.	3 Kewe. N angiin te tai a korakora riki taani kakani maiubuaka nakoia naake a kukumeiia, ngaia are e matebuaka te un ma ngaiia.
4 Ngkana iai ae ko noria ni kumeaki iroun ane e kakani maiubuaka, e tamaroa riki ae ko aki tabe iai.	4 Kewe. N te aekaki aei, ko irekereke naba n te bure are ko noria. Ngkana ko nora temanna ae kumeaki ao ko aki kaotia, ko boutokaa naba te kangaanga ao ko aki katokia.
5 A tataetae ni kamoa aika kakani maiubuaka, ma n angiin te tai a namakina ae akea bongaia.	5 Koaua. E ngae ngke a kainikatonga taani kakani maiubuaka, ma a bati i buakoia aika namakinna bwa akea bongaia, ao a bwainikirinia tabeman bwa a aonga n namakina ae a kakawaki riki.
6 A kona ni bitaki taani kakani maiubuaka.	6 Koaua. Ngkana a buokaki ao a kona ni bitii aia iango ao aroia.