Te Angareirei i Aon te Buuraure ao Tangiraia Ataei

A rinanon te Karaanga ae Ioretan mai Kariraia Iesu ma taan rimwina ao a toua te kawai nakoaiaki rinanoni Berea. Ngke e mena ngkoa Iesu i Berea, ao e a tia n tuangia Baritaio ana kaetieti te Atua i aon te buuraure. (Ruka 16:18) Ao ngkai a a kataa Iesu ni manga maroroakinna naba.

E koreia Mote bwa e kona te buu te mwaane ni buuraure ma buuna ngkana iai te bwai ae e noria iroun neiei ae “kamwara.” (Te Tua-Kaua 24:1) A kakaokoro iango ni kaineti ma kariaiakan te buuraure. A kakoauaa tabeman bwa e kariaiakaki naba i aani buure aika uarereke. Ngaia are a a titiraki Baritaio ni kangai: “E riai bwa e na buuraure te mwaane ma buuna ni kaineti ma bukina aika kakaokoro?”​—Mataio 19:3.

N oneani mwin are e na anaaki nanon Iesu n aia iango aomata, e boni mwaatai n taekina ana babaire te Atua ibukin te mare ni kangai: “Kam tuai ni wareka are teuare karikiia aomata n te moantai, e karaoiia bwa te mwaane ao te aine ao e kangai, ‘Ibukin aei ao e na kitana tamana ma tinana te mwaane ao e na nim ma buuna, ao a na riki n tii te irikona naaka uoman’? Ao ai tiaki ngkai uoman naakai, bwa ai tii te irikona. Mangaia ae ane e botiia te Atua ao ke a tai karaureia, aomata.” (Mataio 19:4-6) Ngke e moani katea te tua ibukin te mare te Atua ibukia Atam ma Ewa, e bon aki baireia bwa e na urua aia mare.

A titiraki Baritaio nakon Iesu ni kangai: “Ao e aera Mote ngke e tua te anga te beeba ni buuraure nakon te aine ao kanakoana?” (Mataio 19:7) E taku Iesu nakoia: “E kariaia Mote bwa kam na buuraure ma buumi ibukini matoatoan nanomi, ma tiaki anne arona man te moantai.” (Mataio 19:8) E aki kaineti “te moantai” ma ana bong Mote, ma e kaineti ma te tai are e moani karaoa iai te mare te Atua i Eten.

E a taekina ngkanne te koaua ae kakawaki Iesu ni kangai: “I taku nakoimi bwa teuare buuraure ma buuna ao e a manga mare ma temanna, e wene ni kimoa. Ma e kona ni buuraure teuanne ngkana e a tia ni wene ni bure [taetae ni Kuriiti, por·neiʹa] nei­enne.” (Mataio 19:9) Ngaia are bon tii te wene ni bure ae kariaiakaki iai te buuraure n te Baibara.

A a kairaki taan rimwin Iesu bwa a na kangai: “Ngkana ngaia aei aron te mwaane ma buuna, ao e a bon raoiroi riki ae akea buum.” (Mataio 19:10) E teretere bwa ane e kani mare e riai n iangoia bwa te bwai ae e na teimatoa!

Ni kaineti ma te tiku n akea buum, e kabwarabwaraa Iesu bwa iai tabeman aika bungiaki n iunaki, bwa a aki riki raoi aia bwai ni kakariki n te aro are a aikoa kona ni wene n taanga. Tabemwaang a kaiunakaki imwini mwakuri n iowawa nakon aia bwai ni kakariki n te aro are a aikoa kona ni wene n taanga. Ma tabemwaang a taon nanoia ni kani wene n taanga. A karaoa aei bwa a aonga ni kabanea riki aia tai ni beku ibukin te Tautaeka n Uea. E a kaumakiia taan ongora Iesu ni kangai: “Ke e kataua aei [te tiku n akea buum] ane e kona ni kataua.”​—Mataio 19:12.

A a moanna ngkai aomata n uotiia natiia nakon Iesu. Ma a un taan rimwina nakoia bwa a tangiria bwa e na aki katabetabeaki Iesu. Ngke e nora aei Iesu, e bon un ao e taku: “A aoriia ni kawarai ataei, tai kataia n tukiia, bwa aia bwai akana ai aroia, ana Tautaeka n Uea te Atua. I tuangingkami te koaua, bwa ane e aki butimwaea ana Tautaeka n Uea te Atua n aron te ataei, ao e na bon aki rin iai.”​—Mareko 10:14, 15; Ruka 18:15.

Ai bon raoiroira te reirei aei! Ngkana ti kani karekea ana Tautaeka n Uea te Atua, ti riai ni katotongi nanorinanoia ataei ma aroia ni kan reireiaki. E boni kaota ngkai ana tangira Iesu nakoia ataei n arona ni bwabwakoiia ao ni kakabwaiaia. Ao bon iai naba ana tangira nakoia aomata nako ake a “butimwaea ana Tautaeka n Uea te Atua n aron te ataei.”​—Ruka 18:17.