E Karaoi Kakai ni Mwaakan Antai?

Imwin tiana ngkekei naba n taekina te kabwarabure ni mwengan te Baritaio are Timon, e a manga uarongorongo riki i Kariraia. Ai ana kauoua n ririki ngkai ni karaoa ana mwakuri ni minita, ao ai tiaki tii ngaia ni mwananga. E airi ngkai ma abotoro ake 12 n ikotaki naba ma “aine tabemwaang ake a a tia ni kainaomataaki man niniakia irouia taimonio ao ni kamarurungaki man aorakia.” (Ruka 8:2) Raoia naba n te tai anne Maria are te I-Maketara, Tutanna, ao Ioana are buun te mataniwi n ana auti te Uea are Erote Antibati.

E ngae ngke a a mwaiti riki aomata ake a ataa Iesu ma e bon rikirake naba uneakinan taekan ana mwakuri. E mataata n aei ngke e a kairaki te mwaane ae taniaki n te taimonio, ae e mataki ao e kabi n taetae. Ma ngkai e a kainaomataaki mai iai, ao e a noraaba ma ni kona n taetae. A mimi iai te koraki ao a taku: “Tao Natin Tawita teuaei?”​—Mataio 12:23.

A otabwaninia te auti are e mena iai Iesu te koraki, n te aro are e a aikoa kona naba n amwarake ma taan rimwina. Ma a aki bane n iangoia ae Iesu bon “Natin Tawita” are e beritanaki. A roko naba tabeman taani koroboki ao Baritaio man te tabo ae raroa ae Ierutarem, tiaki ibukina bwa a na reireinaki irouna ke ni boutokaia. A tuangia aomata ni kangai: “Iai Beretebuba irouna” ao e mwamwakuri ma “mwaakan aia tia tautaeka taimonio.” (Mareko 3:22) Ngke a ongo takaruaean taekan aei ana utu Iesu ao a roko bwa a na taua. Bwa tera bukina?

Ibukina bwa a tuai kakoauaa tarina ae Iesu bon natin te Atua. (Ioane 7:5) E taraa n ae Iesu aei boni ngaia bukin rikin te kiriwe irouia aomata, tiaki n aron Iesu are a ataia ngkoa ngke a uaia n ikawairake ma ngaia i Natareta. N tokina a a bati ake a iangoia bwa e a rotaki ana iango ngaia are a kangai: “E a mino.”​—Mareko 3:21.

Ma tera te bwai ni kakoaua? E a tibwa tia Iesu ni kamarurunga teuae taniaki iroun te taimonio, are e a noraaba ao ni kona n taetae. Bon akea temanna ae kona ni kakewea aei. Ngaia are a kataia ni kabuakakaa Iesu taani koroboki ma Baritaio n aia bukibuki ni kewe, ao a taku: “E aki kanakoia taimonio teuaei, ma e kanakoia ni mwaakani Beretebuba ae aia tia tautaeka taimonio.”​—Mataio 12:24.

E ataa Iesu te baere a iangoia taani koroboki ma Baritaio, ngaia are e a kamataataa ni kangai: “A na bwaka tautaeka n uea nako ngkana a a manga buaka i marenaia kaaina, ao a na aki teimatoa kaawa nako ke utu nako ngkana a unraa kaaina i marenaia. N aron anne, ngkana bon Tatan ae kanakoa Tatan, ao e a kaitaraa iai i bon irouna. E na kangaa ngkanne n teimatoa ueana?”​—Mataio 12:​25, 26.

Ai rabakaura n iango! A ataia Baritaio ae iai tabeman I-Iutaia ake a kakanakoia naba taimonio. (Mwakuri 19:13) Ngaia are e a titiraki Iesu ni kangai: “Ngkana I kanakoia taimonio ni mwaakani Beretebuba, ao a kanakoia taimonio ni mwaakan antai ami aomata?” Nanona bwa e riai naba ni kaineti aia bukibuki ma aia waaki. E reitaanako ngkanne te iango anne Iesu ni kangai: “Ma ngkana I kanakoia taimonio n taamnein te Atua, ao e a bon tia n roko ana Tautaeka n Uea te Atua, ma kam aki ataia.”​—Mataio 12:27, 28.

E kaikonaka mwaakana Iesu i aon Tatan ni kanakoaia taimonio ni kangai: “Ao e na iraanna te aomata n ninia ana auti temanna ae aintoa n anai ana bwai, ngkana e aki kabaea moa? Ao imwina, e a tibwa kuribwaia ana auti teuare aintoa. Ane e aki boutokaai ao e boni kaitaraai, ao ane e aki buokai n ikotiia aomata, ao e kamaenakoia.” (Mataio 12:​29, 30) E teretere bwa taani koroboki ma Baritaio a boni kaitaraa Iesu, ao a anga te bwai ni kakoaua ae boni ngaiia ana koraki Tatan. A kamaenakoia aomata mairoun Natin te Atua are karaoa ana mwakuri n ana ibuobuoki Iehova.

E anga te kauring Iesu nakoia taani karitei aika ai aron Tatan ni kangai: “A na bane ni kabwaraaki aia bure aomata, n aki ongeia bwa te bure raa, ao te kabuakaka raa are a taekinna. Ma ane e kabuakakaa te taamnei ae raoiroi ao e na aki bwara ana bure n aki toki, ma e na teimatoa ni bukinaki iai.” (Mareko 3:​28, 29) Iangoa mwin anne nakoia te koraki ake a bukina te baere e karaoaki iroun taamnein te Atua bwa boni mairoun Tatan!