Karaoan Ana Moani Kakai

Ai te katenua ni bong ngkai imwin rikin Natanaera bwa temanna i buakoia taani moan rimwin Iesu. E a mwananga ngkai Iesu ma taani moan rimwina akanne nako aononi Kariraia are mena iai mwengaia. A na nako Kana ae ana kaawa Natanaera ae mena n te tabo ae tabukibuki i meangin Natareta, are e ikawairake iai Iesu. A kaoaki nakon te baka ni mare i Kana.

E roko naba tinan Iesu n te mare anne. E bae n ibuobuoki Maria ibukin tararuaaia iruwa aika bati ngkai bon raoraoia kaain aia utu naake a mare. E waekoa n ataia ae e a bane te wain, ngaia are e a tuanga Iesu ni kangai: “E a bane aia wain.”​—Ioane 2:3.

E taekina ana iango Maria bwa e na karaoa te bwai teuana Iesu ibukin aki taun te wain. E taetae ni karariki Iesu ni kaota te totoko ao e kaeka ni kangai: “Neiko, e aera ngkai N na irekereke iai ao ngkoe naba?” (Ioane 2:4) Ngkai ngaia te Uea ae rineaki iroun te Atua, e riai ni karaoa ana mwakuri ngkana e kairaki iroun Tamana are i karawa, ma tiaki irouia ana utu ke raoraona. Ma e iangoraoi Maria ni katuka taekan aei iroun natina ao e tii kangai nakoia taan ibuobuoki: “Karaoa te bwai ane e tuangingkami.”​—Ioane 2:5.

Iai oneai kaatibu n ran ae kanoan teaina e riaon tebwina te kaaran. E tua Iesu nakoia taan ibuobuoki ni kangai: “Kaoni kaatibu aikai n te ran.” E taku ngkanne Iesu: “Itia teutana ngkai ao uotia nakoni mataniwin te baka.”​—Ioane 2:7, 8.

E anaaki nanoni mataniwin te baka n raoiroin te wain ma e aki ataia ae karaoaki n te kakai. E wetea te tia mare te mwaane ao e taku: “A kaotinakoa moa te wain ae raoiroi aomata nako, ao ngkana a a koro ni manging iruwa, ao a a tibwa anga te wain ae aki bati n raoiroi. Ma ngkoe ko kawakina te wain ae raoiroi ni karokoa ngkai.”​—Ioane 2:10.

Bon aei ana moani kakai Iesu are karaoia. E a korakora riki onimakinana irouia taan rimwina aika boou aikai n noran te kakai aei. Imwina e a mwananga nako Iesu ma tinana ao tarina mairoun tinana nakon te kaawa ae Kaberenaum ae mena i meangimaeaon Namani Kariraia.