Tera Aron Iangoan te Baibara Iroum?

TE BAE E TAEKINAKI N TE BAIBARA

“E kairaki korean te Koroboki ae Tabu ni kabane iroun te Atua.” —2 Timoteo 3:16, Te Baibara ae Tabu​—Te Rairai ae te Aonnaba ae Boou.

MANENANA IBUKIM

Kaeka aika karaunano nakon titiraki aika kakawaki ibukini maiura.​—Taeka N Rabakau 2:1-5.

Te kairiri ae riai n onimakinaki ni maiura n te bong teuana ma teuana.​—Taian Areru 119:105.

Te kantaninga ni koaua ibukin taai aika a na roko.​—I-Rom 15:4.

TI KONA N ONIMAKINA RAOI TE BAE E TAEKINAKI N TE BAIBARA?

Eng, bwa iai bukina aika tenua:

• Kamimini boraoini kanoana. E koreaki te Baibara i nanon te maan ae raka i aon 1,600 te ririki irouia 40 aomata aika kakaokoro. Angiina mai buakoia, a tuai ni kakaitiboo mai mwaina. Ma e ngae n anne, e boraoi kanoana ni kabane ao e kamoamoaaki iai aran te Atua ao ana tautaeka!

• Rongorongon rimoa ae koaua. N angiin te tai, a kataia taani korei rongorongon rimoa ni karabaa taekani konaakia aia aomata n te buaka. Ni kaitaraan anne, a korei raoi rongorongoni kabwakaia taani korea te Baibara ao kabwakaia naba aia botannaomata.​—2 Rongorongo 36:15, 16; Taian Areru 51:1-4.

• Te taetae ni burabeti ae kona n onimakinaki. E a kaman taetae ni burabetinaki n te Baibara aron uruakan te kaawa are Baburon ngkoa, 200 tabun te ririki imwain rikina. (Itaia 13:17-22) E aki tii taekinaki iai aron uruakani Baburon, ma e taekinaki naba iai aran teuare e na tokanikai!​—Itaia 45:1-3.

A kakoroaki naba bukin taetae ni burabeti riki aika bati n aron are a a tia ni koreaki. Ma tiaki ngaia anne ae ti kantaningaia n Ana Taeka te Atua?​—2 Betero 1:21.