Reirei 15

Buokaia Aomata Tabeman Bwa A na Karaoa Nanon te Atua

Bukin tera ngkai ko riai n tuangia aomata tabeman rongorongonbwaai aika ko tabe n reiakin? (1)

Ko kona n taekina te rongorongo ae raoiroi nakon antai? (2)

A na kanga ni kona n rootaki aomata tabemwaang n aroarom? (2)

N ningai ae ko kona n uaia n iri ma te ekaretia n tataekinan te rongorongo? (3)

1. Ko a tia ngkai n reirei bwaai aika bati aika raoiroi man te Baibara. Te atatai aei, e riai ni kairiko bwa ko na rikirake n te aroaro ni Kristian. (I-Ebeto 4:​22-24) Moan te kakawaki te atatai aei, ibukin reken te maiu are aki toki iroum. (Ioane 17:⁠3) Ma, a riai naba n ongora te rongorongo ae raoiroi aomata tabemwaang, bwa a aonga ni kamaiuaki. A riai ni kaotiota te rongorongo nakoia aomata tabemwaang, Kristian ni koaua ni kabane. Bon ana tua te Atua.​—​I-Rom 10:10; 1 I-Korinto 9:16; 1 Timoteo 4:⁠16.

2. Ko kona ni moana karaoan aei ngkana ko maroro ma aomata aika mena irarikim, n taekan bwaai aika a raoiroi aika ko a tia n reiakin. Taekin bwaai aikai nakoia kaain am utu, raoraom, raom n reirei ao raom ni mwakuri. Bwaina te akoi ao te taotaonakin nano ngkana ko karaoa aei. (2 Timoteo 2:​24, 25) Uringnga bwa aomata, a tabeakina riki aroaron te aomata are a noria, nakon bwaai ake e taekin. Mangaia are, aroarom ae raoiroi, e kona n anaa nanoia aomata ni kan ongora n am rongorongo.​—⁠Mataio 5:16; 1 Betero 3:​1, 2, 16.

3. Imwin tabeua te tai, e kona naba n tau arom ibukin irakin tataekinan te rongorongo ma kaain aia ekaretia Ana Tia Kakoaua Iehova ae kaan ma ngkoe. Te mwaneka ae kakawaki n rikirakem aei. (Mataio 24:14) Ai kimwareirei ra ngkoe ngkana ko kona ni buoka te aomata temanna bwa e na riki bwa ana toro Iehova ae e na reke irouna te maiu are aki toki!​—⁠1 I-Tetaronike 2:​19, 20.