Mwakoro 2
Te Aonnaba ae Akea te Karawawataki Iai
1, 2. Tera te kaantaninga ae okoro ae a iangoia aomata aika bati?
MA A okoro aia iango aomata aika mirion ma mirion mwaitiia ni katobibia te aonnaba. A kariaa bwa e na mweeraoi te aba nakon taai aika a na roko. A taku bwa e na waekoa ni mauna te buakaka ao te karawawataki n te aonnaba aei. A kakoauaa raoi bwa e a kaani mauna te buakaka, ao e nang kaboouaki te waaki i aon te aonnaba. A taku naba bwa e a tabe ni waboboaki ngkai aan ana waaki te Atua ae boou!
2 A kakoauaa aomata aikai bwa e nang akea te buaka, te iowawa, te kakeru, te babakanikawai ao te kainnano n te aonnaba ae boou. Ai akea naba te aoraki, te nanokawaki, te tang ao te mate. N te tai anne ao a na rikirake ni kororaoi aomata, ao ni maeka n aki toki ma te kukurei n te baretaiti n te aonnaba. A na kautaki naba ake a a tia ni mate ma n anganaki aia tai ni karekea te maiu n aki toki!
3, 4. E aera ngkai a rangi ni koaua raoi n aia iango aomata aikai?
3 Ma te koaua bwa te mii taekan te tai ae e na roko aei, ke te iango ae karioaki? Bon tiaki. E boboto i aon onimakinan ae e na bon roko te Baretaiti. (Ebera 11:1) E aera ngkai a rangi ni koaua raoi iai? Ibukina bwa bon ana berita te tia Karikii bwaai ni kabane ae moan te mwaaka.
4 E kangai te Baibara ni kaineti ma ana berita te Atua: “Akea te bwai teuana ae bwaka mai buakoni bwaai aika raraoi ni kabane ake E taekiningkami iai Iehova ae Atuami; a bane ni koro bukiia nako imi, akea te bwai teuana ae bwaka mai buakoia.” “Tiaki te aomata te Atua, ae E na kewekewe iai . . . E a tia n taku, ao tiaki E na karaoia? Ke E a tia n taetae, ao tiaki E na boni kakoroa bukin ana taeka?” “E taetae n tuea Iawe ae moan te maka ni kangai: ‘N na karaoa ae I a tia n iangoia, N na kakoroa bukin au moti.’”—Iotua 23:14; Warekaia Iteraera 23:19; Itaia 14:24, BK.
5. Baikara titiraki aika riai ni kaekaki?
5 Ma ngkana bon ana kaantaninga te Atua bwa e na baretaiti te aonnaba n akea iai te karawawataki, ao e aera ngkai e kariaia rikin baika bubuaka n te moantai? E aera ngkai e tataninga i nanon onoua te ngaa te ririki ni karokoa ngkai ibukin kaetan te kangaanga? Tao e kaotaki n tienture aika bwakanako aikai bwa e aki tabeakinira te Atua, ke tao bon akea Ngaia?