KARAKI 95
Aron Iesu N Angareirei
N TE taina ao e tuanga temanna te mwaane Iesu bwa e riai teuaei n tangira raona n aomata. E titirakina Iesu te mwaane aei ni kangai: ‘Antai raou?’ E ataa ana iango te mwaane aei Iesu. E kaantaningaia bwa raona bon tii kaain ana Aro ke kaain ana reeti. Mangaia are ti na noria bwa tera ae e taekinna Iesu nakoina.
N tabetai ao e angareirei Iesu n te karaki. Aio te bwai ae e karaoia ngkai. E taekina karakinan te I-Iutaia ao te I-Tamaria. Ti a tia n reiakinna mai mwaina are angiia I-Iutaia, a riribaia kaain Tamaria. E kangai ana karaki Iesu:
N te bong teuana ao e a mwananga te I-Iutaia temanna nako Ieriko, n toua te kawai are n te maunga. Ma e reke irouia taani kamwarua. A anaa ana mwane ao a batiboia ni karokoa ae e a kuri ni mate, ao a kitanna.
Imwina ao e a mwananga ibongan Iutaia, n te kawai naba anne. E nora te aomata are e oreaki. N am iango tera ae e karaoia? E katuaa n nako ni kaea iteran te kawai are teuana ma n reita nako kawaina. Imwina ao e a manga mwananga naba temanna te aomata ae rangi n taua te Aro. Bon temanna mai buakoia tibun Rewi. E tei teuaei? E aki naba tei teutana ni buoka te mwaane are e kamwaruaaki arei. Ko kona n noriia te ibonga ao tibun Rewi, ake a koakoanako akekei.
Ma nora te mwaane ae mena iroun teuae kamwaruaaki aei. Bon te I-Tamaria. Ao e tabe ni buoka te I-Iutaia. E kabira manekan teuaei n te bwainnaoraki. Imwina e uota te I-Iutaia aei nakon te tabo teuana, are e na motirawa iai ma ni kamarurungnga.
Ngke e a moti ana karaki Iesu, ao e taku nakon te mwaane are e titirakinna: ‘Antai i buakoia mwaane aika teniman aikai, ae e karaoa te mwakuri ni kaotia bwa boni ngaia raon teuare kamwaruaaki? Te ibonga, ke tibun Rewi, ke te I-Tamaria?’
E kaeka ni kangai te mwaane arei: ‘Te I-Tamaria, bwa e atataiaomata nakon teuare kamwaruaaki.’
E taku Iesu: ‘Ko eti. Mangaia are naako ao karaoa naba are e karaoia nakoia aomata.’
Ko aki taatangira aron ana angareirei Iesu aei? Ti kona n reiakini bwaai aika kakawaki aika mwaiti kurikuri, ngkana ti kakauongo raoi nakon te bwai are e taekinna Iesu n te Baibara. Tiaki te koaua anne?