Ko na Kangaa n Rineia?
“E boni manennanti n riki te iuniweeti.” —Stephen Hawking ao Leonard Mlodinow, taan rabakau n te physics, 2010.
“E karika karawa ma te aonnaba te Atua.”—Te Baibara, Karikani Bwaai 1:1.
E karika te iuniweeti ma baika maiu i nanona te Atua, ke a manennanti n riki? Aia kaeka taan rabakau aika uoman aika mwaneweaki n te kaongora aio ibukin te titiraki anne, e bon rangi ni kaokoro ma ana moan taeka te Baibara. Iai aika boutokai kaeka akana uoua akanne. Ma a bati naba aika aki koaua raoi iai. A kauntaekaa aio aomata, ni booki aika rangi n taabangaki ao n te terewitin.
A bae n taekinna am tia reirei bwa te iuniweeti aei ao baika maiu i nanona, a boni manennanti n riki ao akea te tia Karikiriki. Ma iai te bwai ni kakoaua ibukin anne ae a anganiko am tia reirei? N te itera are teuana, ko bon bae n tia n ongo aia reirei mataniwi n Aaro bwa bon iai te tia Karikiriki. Ma a anganiko te bwai ni kakoaua ibukin anne? Ke a tuangko bwa ko na kakoauaa, e ngae ngkai akea te bwai ni kakoaua, ke ibukina bwa a tuangko?
Akea te nanououa bwa ko a bae n tia n iangoa te titiraki aei, ao ko bae n iangoia bwa akea ae kona n taekinna raoi bwa iai te tia Karikiriki ke akea. Ao e bae n iai am titiraki, n aron ae: E kakawaki bwa N na ataa te kaeka iai?
N te maekatin ae te Taratara! aei, ao e na moani kabwarabwaraaki iai tabeua koaua aika a a tia ni kairiia aomata aika bati, bwa a na kakoauaa ae iai te tia Karikiriki. Imwina, e na maroroakinaki bwa e aera ngkai e kakawaki ataakini kaekaan te titiraki ni kaineti ma moan rikin te maiu n te aonnaba.