Te Onimaki
E oti n te moani kaongora n te maekatin aei, bwa a bati aomata aika iangoa te Baibara bwa bokin te Aro. Ngkana a warekia ao ni maiuakin ana kairiri, a a kakorakoraaki iai aia onimaki, ao a ataia iai ae e manena maiuia.
E kabongana te taeka ae te ‘taamnei’ te Baibara, ni kabwarabwaraa aroia aomata aika bwaina te aroaro ke te aeka ni maiu teuana. (Iuta 18, 19) A onimakin oin aia iango aomata aika aki kani kairaki iroun te Atua, ma aomata aika kani kairaki iroun te Atua a onimakin ana kaetieti nako.—I-Ebeto 5:1.
TE KANTANINGA AE RAOIROI
ANA BOTO N REIREI TE BAIBARA: “Ngkana ko namakina te bwarannano n tain te kangaanga, ao ane e na karako korakoram.”—Taeka N Rabakau 24:10, kabwarabwara mai nano.
AE NANONAKI IAI: E kona te bwarannano ni kakerikaaka te korakora are ti kainnanoia ibukini kaitaraani kangaangan te maiu aei. Ma e kona te kantaninga ae raoiroi ni kakorakoraira bwa ti na teimatoa ni waakinako. E kona ni karaunano ataakin ae a na bon toki kangaanga aika ti boo ma ngaai, ao bon iai te bae e raoiroi imwina.
TE BWAI AE KO KONA NI KARAOIA: Iangoi baika raraoi ibukin taai aika imwaim. Tai raraomaeakina te bae kona n riki ke ni kakantaningaa te tai ae a na nakoraoi iai bwaai, ma mwakuria tiam. A boni kona n riki “baika aki kantaningaaki.” (Te Minita 9:11) Ma n angiin te tai a nanakoraoi riki bwaai nakon are ti kantaningaia. E kabongana te taeka ni kaikonaki te Baibara ibukin te ununiki ni kangai: “Uniki am koraa n te ingabong ao tai kamotirawaa baim ni karokoa ae bong, bwa ko aki ataia bwa e nga ae e na materaoi, bwa tao aei ke arei, ke tao a na bon uaia n nakoraoi.”—Te Minita 11:6.
KAEKA NAKON TITIRAKI AIKA KAKAWAKI AIKA IREKEREKE MA TE MAIU
ANA BOTO N REIREI TE BAIBARA: “Anganai te ataibwai . . . Am taeka . . . bon te koaua.”—Taian Areru 119:144, 160.
AE NANONAKI IAI: Iai n te Baibara kaekaan titiraki aika a tatabeki aomata. N te katoto, e kaekai titiraki n aron aikai
Ti riki mai ia?
Tera bukini menara ikai?
Tera ae riki nakon te aomata ngkana e mate?
Ai bon aroaron naba maiura aei?
A a tia mirion ma mirion aomata ni katobibia te aonnaba ni kanakoraoa riki maiuia, n aroia n ukeri ana kaeka te Baibara nakon titiraki aikai ao tabeua riki.
TE BWAI AE KO KONA NI KARAOIA: Tuoa i bon iroum bwa tera ana reirei te Baibara. Butiia temanna Ana Tia Kakoaua Iehova bwa e na buokiko n ota n te Baibara. Mamataku n ara atureti n te intanete ae jw.org, ke kaea ara taromauri, ae akea iai te rikomwane ao a butimwaeaki iai aomata nako.
BOOTO N REIREI RIKI TABEUA MAN TE BAIBARA
Mataku n te taamnei ae E Aera Ngkai E Raoiroi te Reirei n te Baibara? n te jw.org. E tauraoi n taetae aika raka i aon 880
ATAI BAIKA KO KAINNANOI NI KAINETI MA TE ONIMAKI.
“A a kukurei akana ataia bwa a kainnanoa te Atua.”—MATAIO 5:3.
REIAKINA RIKI TAEKAN TE ATUA ARE TAEKINAKI N TE BAIBARA.
“Ukoukora te Atua . . . bwa [ko] aonga ni kunea . . . E bon aki raroa mairoura n tatabemanira nako.”—MWAKURI 17:27.
WAREKA TE RONGORONGO AE N TE BAIBARA AO IANGOIA RAOI.
“E rangi ni kimwareirei n ana tua Iehova,a ao e kananoa ana iango i aon Ana tua ni ngaina ao ni bong. . . . A na nakoraoi bwaai nako aika e karaoi.”—TAIAN ARERU 1:2, 3, kabwarabwara mai nano.
a Iehova bon aran te Atua ae kaotaki n te Baibara.