Ko Kona n Tokanikai!

AIO am tai n “ninikoria ao waakina te mwakuri.” (1 Rongorongo 28:10) Baikara kabanea ni mwaneka aika a na kaangaraoa riki tokanikaim?

Namata te bong. E taekinna te U.S. Department of Health and Human Services bwa ngkana ko a motikia bwa ko nang kaaka te moko ao ko bon riai n aki ringnga i nanon uoua te wiki, bwa e aonga n teimatoa iai korakoran nanom ni kani kaakia. Mwaakena te bong anne n am karenta, tuangia raoraom ao tai bita te bong anne e ngae ngkana iai bitaki tabeua.

Karaoi “beeba ni kauring ibukini kaakana.” Tao taeka n aron aika a oti imwina riki, n ikotaki naba ma baike a na kakorakoraa nanom ni kani kaakia:

● Bukini kaakana

● Nambwan aia tareboon naake ko na maroro ma ngaiia ngkana e a manga roko tangirana

● Reireiam​—tao kiibu man te Baibara n aron I-Karatia 5:​22, 23​—ake a na buokiko ni karokoko n tiam

Uouotii am beeba ni kauring ibukini kaakana ao wawareki ni katoabong. E ngae ngkana ko a kaaka te moko, bon teimatoa ni wareki beeba akanne ngkana e a manga roko angin te kani moko.

Atai baika a na kauekea tangirana ao kabokorakora ni kaaitarai. Imwain rokom n te bong are ko a tia n namatia bwa ko na kaaka iai te moko, bitii moa bwaai tabeua ake a na kauekea tangirana. N te katoto, ngkana ko tataneiai n uti ni moko n te ingabong ao tai waekoa moa ni moko, ma kamaanna tao teuana ke uoua te aoa ao ko a tibwa moko. Katoka arom ae te moko n tain ke imwin te amwarake. Kararoai taabo ake a momoko iai aomata. Ao kataneiaiko ni kanenea bwanaam n taetae i bon iroum ni kangai: “Ko rabwa, I a kaaka te moko.” A na kona mwaneka aikai ni katauraoiko nakon am bong ni kaaka te moko. A na kauringko naba ae i aoni kawaim ngkai n riki bwa te tia moko ngkoa.

Tauraoi ni kaakia. Ngkana e a kaan am bong are ko nang kaaki iai ao kabooi ni katauraoi baike ko na katabetabea iai wim n aron taian carrot ake a korokoreaki, te kam, taian nut ao a a bati riki. Kauringia raoraom ao am utu taekan te bong anne ao baike a na kona ni boutokaiko iai. Imwain raoi te bong anne, karenakoi am tiin ni mannang, am tibwaake, ao baike ko na kai mwane iai n aron tikareti ake a mena ni mwengam, n am kaa ke n am buua, ke n am tabo ni mwakuri. E aonga ni bebete raoi iroum kaakana! Teimatoa naba n tataroakina ana ibuobuoki te Atua, e a moamoa riki imwin am kabanea ni moko.​—Ruka 11:13.

A mwaiti aika a a tia n “raurenako” ma aia tikareti, are bon tiaki te rao ni koaua ao e karuanikai iowawaana. Ko kona naba ni karaoa anne. Ko na namakina riki iai marurungim ao kakukurein te kainaomataaki mai iai.

[Kabwarabwaraan te taamnei]

Uouotii am beeba ni kauring ibukin kaakana ao wawareki ni katoabong