Te Reta Man te Rabwata n Tautaeka
Nakoia Taari:
“Ti aki toki ni kaitaua te Atua ngkana ti mwanewei taekami ni kabane n ara tataro, bwa ti aki toki n iaiangoi ami mwakuri aika nako man ami onimaki ao ami bekutata ae kairaki n te tangira, ao nanomwaakami ae boto i aon ami kantaninga ibukin ara Uea ae Iesu Kristo, i matan Atuara ae Tamara.” (1Te. 1:2, 3) Ai bon tamaroara taeka aikai, aika kaota kukurein nanora ibukimi! Ti kaitaua Iehova ibukin ami mwakuri ae raoiroi are kam a tia ni kakororaoia. Ibukin tera?
N te ririki ae nako ao kam a tia ni katabetabeingkami n “ami mwakuri aika nako man ami onimaki” ao ami “bekutata ae kairaki n te tangira” aika irekereke ma te Tautaeka n Uea. A tia angiina mai buakomi ni kakaaei aanga ni karababaa ami mwakuri ni minita. A mwaing tabeman nakon aono ke aaba riki tabeua ake a kainnanoaki riki iai taan tataekina te rongorongo ae raoiroi ibukin te Tautaeka n Uea. Tabeman, a karababaa aia mwakuri n uataboa te uarongorongo n ana tabo te botannaomata. A bati ake a kaungaaki bwa ana aokitirari bwaiania n namwakainan te Kauring, n te namwakaina are e roko iai te mataniwi ae mwamwananga, ke n Aokati 2014 n te bong ni mwakuri ae okoro. E ngae ngke a kakaokoro baika kam rinanoi, ma ti kakoauaa bwa kam mwakuri ma nanomi ao korakorami ni kabane ibukin Iehova ao ti kamoamoaingkami iai. (Kor. 3:23, 24) Anne bukina ngkai ti riai ni kaitaua Iehova ibukin ami “mwakuri aika nako man ami onimaki”!
Ti rangi ni kaitauingkami naba n ami “bekutata ae kairaki n te tangira,” are e irekereke iai ma kataean ana tabo Iehova aika bati ni katobibia te aonnaba. Ti kainnanoa kaumakani karaoan aeka ni kateitei aikai, ngkai e a tabe n ririkirake mwaitiia ana aomata Iehova. (It. 60:22) Karaua iangoia, mwaitiia ara taani uarongorongo n te ririki aei bon 8,201,545 ao e kaania 9,499,933 mwaitiia aika a reirei n te Baibara ni katoa namwakaina. Ibukin te rikirake ao a a bati aobiti n tararua ake a tangira kabuburaaia ke onobwaiakia. Are nanona naba bwa ti kainnanoi Taabo n Taromauri aika bati! Irarikin anne, a kainnanoaki naba aobiti n rairai n aaba aika uarereke n iteran nako te aonnaba, bwa a aonga ara taan rairai ni kona ni maeka ao ni mwakuri n te tabo are e kabonganaaki iai aia taetae.
E ngae n anne, ti kona n titirakinira ni kangai: ‘Tera arou ni boutokai katean taabo aikai?’ A kona tabeman i buakora n anga ngaiia n te mwakuri ni kateitei. Ma e ngae ngkana iai ke akea mwaataira iai, ma ti bane n anga baika bongana ibukini boutokaani kateitei aika kakawaki aikai. (TNR. 3:9, 10) E korakora aia anganano tibun Iteraera ni katean te umwanrianna ae tabu, n te aro are e a katanoataaki bwa a riai n aki anga ae bati riki. (TeOti. 36:5-7) Ti aki nanokokoraki bwa a ringaki ao ni kaungaaki nanora ni katoto aika n te Baibara. Anne naba bukina ngkai ti kaitaua Iehova ibukin ami “bekutata ae e kairaki n te tangira,” ni waakinan taromauri aika kakawaki aikai!
Iai naba bukini kakaitaura ae okoro ngkai ti noriia tarira aika a teimatoa n nanomwaaka. N te katoto, iangoiia tarira ake i Korea Maiaki. Ni moa man 1950, a a tia ni kabureaki i nanon ririki aika kakaokoro maania, ibukin teia i nuka. A a tia tarira man te roro teuana ma teuana n nanomwaaka i aan te kataaki aei, n aki kaingingaki. A a boni kakorakoraaki ara onimaki n aia katoto ibukin te nanomwaaka!
I aon Eritrea ao a kabureaki teniman tarira n te maan ae raka i aon 20 te ririki. A tia naba tabeman tarira aine ma natiia ni kabureaki n taai aika kimototo. A karaoaki aanga aika bati ibukini kainaomataaia, ma akea aika a tia ni kainaomataaki. A bon aki bwara nanoia tarira. A teimatoa ni kakaonimaki ma nanoia ae eti ni baike a rinanoi aika kakaiaki. Ti bon aki mwaninga taekaia koraki aika kakaonimaki aikai n ara tataro.—Ro. 1:8, 9.
Ni koauana, a aki kabureaki angiina mai buakora ibukin ami onimaki. Ma a bati aika a kekeiaki ribuakon te kara, aorakin te rabwata aika wenemaan, te kakaaitara mairouia raao ke koraki aika ti aki kaain te onimaki, n ikotaki naba ma aia kangaanga n tatabemania nako ake kam bon atai. E ngae n anne, teimatoa ni beku ibukin Iehova ma te kakaonimaki! (Iak. 1:12) Ti boni kamoamoaingkami. Anne naba bukina ae ti kaitaua iai Iehova n nanomwaakami n ami onimaki.
Eng, aikai bukini “katituaraoan Iehova; ba E raoiroi” iroura ibukin ami mwakuri ae nako man te onimaki, ami bekutata ae kairaki n te tangira ao nanomwaakami n ami onimaki. (TA. 106:1, BG) Ti bon tangiringkami ni kabane ao ti tataro bwa e na kakorakoraingkami Iehova, e na kateimatoaingkami ao ni kakabwaiaingkami bwa kam aonga ni beku ibukina n aki toki.
Tarimi,
Te Rabwata n Tautaeka ibukia Ana Tia Kakoaua Iehova