Te Reta Mairoun Te Rabwata n Tautaeka

Nakoia Raora Aika Taani Kakoaua Ibukin Iehova:

Ti rangi ni kukurei ni koroboki nakoimi ni kabane ana toro Iehova aika kakaonimaki ao n tangiraki iroura, ae mwaitimi ngkai e raka i aon itua te mirion. Ngkana kam kaitiboo ma temanna kaain te onimaki n te aba teuana, kam na bae n namakina te tangira i marenami, ae te bwai ni kabaebae ae okoro. (Ioa. 13:34, 35) Akea te nanououa bwa kam na manga namakina naba te katiteuanaaki ae te bwai ni kabaebae, ngkana kam wareki rongorongo aika kakaongora n te Yearbook aei, ae rongorongon aia onimaki ma aia kakaonimaki ni koaua taari mwaane ao aine n aaba aika kakaokoro.

E kaotaki n taian ribooti ni katobibia te aonnaba bwa a bati mai buakomi aika ira nanon te babaire ibukin te Taromauri n Utu. Iai mai buakomi aika kabonganai aanga aika bati bwa a aonga n anaaki nanoia natiia ao n aki botu n te Taromauri n Utu. (IEbe. 6:4) A kaaniaki riki taanga ni mare imwini maroroakinani bwaai n taamnei irouia ae reke man te babaire aei. (IEbe. 5:28-33) Ni koauana, a a kakabwaiaaki utu nako ao ngaira n tatabemanira nako n te babaire aei ibukin te ukeuke n reirei n Ana Taeka te Atua.—Iot. 1:8, 9. 

Ti reitaki ma ngkami ni kabane ake kam taonaki n te rawawata ni buaia raomi ni kabuanibwai aika tibwa tia n riki. E a reke iai ara tai n anga ara kakaitau nakoia naake a aki tabwarabwara n ira buakon te mwakuri n ibuobuoki n rikini kabuanibwai n taai akanne. (Mwa. 11:28-30; IKar. 6:9, 10) Irarikin anne, i nanon ekaretia nako ao iai mai buakomi aika a nori baike a kainnanoi taari ao ni buokiia iai. Kam karaoi “mwakuri aika bati aika raraoi ma n anganga bwaintangira” n aron Toreka are e karakinaki n te Baibara. (Mwa. 9:36) A na rau nanomi bwa Iehova e nora te bae kam karaoia, ao e na bon anganingkami kaniwangami ni kaineti ma ami mwakuri.—Mat. 6:3, 4.

N aaba tabeua ao e kona ni kakeaaki inaomatami irouia te koraki aika mwaatai ni kamangaoi tuua, bwa a aonga ni ‘karaoi mwakuri n iowawa n aia kaetieti.’ (TaiAre. 94:20-22, BG) Ma kioina ngkai kam ataa te bwainikirinaki bwa e a kaman taetae ni burabetinna Iesu, kam a nanomwaaka iai ma te ninikoria i aani bwainikirinami ao kam onimakina Iehova bwa e na kamaiuingkami. (Ioa. 15:19, 20) A na rau nanomi tarira aika tangiraki bwa ti aki toki ni mwaneweingkami n tatabemaningkami nako n ara tataro, ngkai kam teimatoa ni “kaekaia aomata nako ake a titiraki bwa tera bukin te kantaninga ane iroumi.”—1 Bet. 3:13-15.

Ti rangi ni kamoamoaingkami aika mirion ma mirion mwaitimi, aika kam kateimatoa te aroaro ni maiu ae itiaki ni katoa ririki n aki ongei ana waaki ni kakaaitara Tatan ae aki kona n toki ni karaoan aroaro aika kammaira, ao aanga aika raba ake e kabonganai. N taai aikai, ngkai e a kerikaaki riki iai maiuakinani kaetieti ibukin te aroaro ni maiu ae riai irouia kaain te aonnaba, ma kam “teimatoa ni karekea korakorami iroun te Uea ao ni korakorani mwaakana.” (IEbe. 6:10) Kam a tia ni “karini ami bwai ni buaka nako ake mairoun te Atua,” ao kam a kona n tei n nene ni kaaitarai “ana kunemwaan nako te Riaboro.” (IEbe. 6:11, 12) Kam riai n ataia ae Iehova e kabonganai ami katoto ni kaekaa iai te tia kakaniko ae Tatan!—TaeRab. 27:11.

E rangi ni kaungaaki nanora ni mwaitiia ake a roko ni kaea Kauringani maten ara Uea n 2011, ae 19,374,737. E reke te mwaiti ae kakukurei anne mani kukurein nanomi ni butimwaea te kakao ibukin te auxiliary bwaiania i nanon Eberi n te ririki ae nako. Mirion ma mirion kaain te aonnaba ake a kona n ongo te bwanaa ae katiteuanaaki ibukini kamoamoaan Iehova, mairouia ana Tia Kakoaua aika kakaonimaki! (IRom 10:18) E ngae ngkana tao ngkoe temanna mai buakon te mwaiti ae 2,657,377 ake a auxiliary bwaiania n te namwakaina anne, ke ko kakorakorako ni karikirakea am mwakuri n aanga tabeua, ma ti rangi ni kimwareirei iroumi ni kabane ibukini kukurein nanomi ao ingaingami ibukin te mwakuri.—TaiAre. 110:3; IKoro. 3:23.

N te ririki ae nako ao 263,131 mwaitiia ake a kaota katabuani maiuia nakon Iehova. Ti kaitaua Iehova ibukin aei, ao ti karabwaingkami naba ni kabane ngkai kam raonira n tataekina te kakao nakoia aomata nako ae kangai: “‘Nakomai!’ Ao ke e kangai ane ongo: ‘Nakomai!’ Ao ke e nakomai ane taka, ao ane kan anaa te ran ni kamaiu ao ke e anaia n akea boona.” (TeKao. 22:17) Imwin ongoraeani kabwarabwara aika kakaokoro ake a karaoaki n te bwabwaro n 2011, ae kaineti ma tein Ana Tautaeka n Uea te Atua, ao e a kakorakoraaki riki iai nanora bwa ti na atonga ae kangai: “E Bia Roko Ana Tautaeka N Uea te Atua!” A kaungaaki nanora n ana taeka ni karaunano Iesu ae kangai: “I a waetata n roko,” ao ti a booti iai bwanaara ma nanora ni kabane n atonga ana taeka te abotoro Ioane ae kangai: “Amen! Nakomai, te Uea ae Iesu.”—TeKao. 22:20.

Ngkai kam teimatoa n tantani ibukin rokon te tai ae rangi ni kakimwareirei anne, ao a na rau nanomi bwa ti tangiringkami n tatabemaningkami nako ma nanora ni koaua, tarira ao mwaanera aika kam kaotiota ami tangira ibukin Iehova “n te mwakuri ao n te koaua”!—1 Ioa. 3:18.

Tarimi,

Te Rabwata n Tautaeka Ibukia Ana Tia Kakoaua Iehova