Katauraoa Nanom

Ti tangiria bwa e na rotaki nanora n ana iango Iehova ngkana ti wareka te Baibara. E katea te katoto ae tamaroa Etira n te itera aei ngke e “katauraoa nanona bwa e na ukoukora ana Tua Iehova.” (Etira 7:10) Ti na kangaa ni katauraoa nanora?

Tataro. Moana am ukeuke n reirei ma te tataro. Bubutiia Iehova bwa e na buokiko n ota ao ni maiuakina te baere ko reiakinna.​—TaiAre. 119:​18, 34.

Karikirakea te nanorinano. E karabaa te koaua te Atua mairouia akana kamoamoa n onimakina oini wanawanaia. (Ruka 10:21) Tai karaoa am ukeuke n reirei tii ibukini kani kamoamoaam irouia tabemwaang. Nanorinano ni bita am iango ngkana e aki boraoi ma ana iango te Atua.

Kataia n ongoraea teuana anenen te Tautaeka n Uea. E kona te anene n rota nanora ao ni katauraoira nakon te taromauri. Ngkana ko ongoraea teuana anenen te Tautaeka n Uea imwaini moanakin am ukeuke n reirei, e na kona ni buokiko ni katauraoa nanom.