Titiraki Mairouia Taani Wareware

Ngke e moani karaoa Iesu Ana Katairiki te Uea, a mena ia taan rimwina ake 70 ake e kanakoia n uarongorongo? A a kitana Iesu?

Ti aki riai n iangoia bwa a aki tau i matan Iesu taan rimwina ake 70 ke tao a kitanna, tii ibukina bwa a aki mena i rarikin Iesu ngke e karaoa Ana Katairiki te Uea. E bon tii tangiria Iesu ni kan ikotaki ma ana abotoro n te tai anne.

E tangiriia ana abotoro ake 12 ao taan rimwina ake 70. Mai buakoia taan rimwina aika bati, ao e rineiia moa mwaane aika 12 Iesu ao e arania bwa ana abotoro. (Ruka 6:12-16) E mena i Kariraia ngke “e ikotiia naake Tengauni ma Uoman” ao “e kanakoia bwa a na uarongorongoa taekan ana Tautaeka n Uea te Atua, ao ni katoki aoraki.” (Ruka 9:1-6) Imwina riki i Iutaia ao e a “manga rineiia riki 70 aomata [Iesu] ao e kanakoia ni kakauomania.” (Ruka 9:51; 10:1) Are nanona bwa iai taan rimwin Iesu n aono aika kakaokoro ake a uarongorongoa iai taekana.

A bae I-Iutaia ake a a riki bwa taan rimwin Iesu ni karaoa te Toa are te Riao ma aia utu n te tai anne. (TeOti. 12:6-11, 17-20) Ngke e a uakaan taini matena ao e a nako Ierutarem Iesu ma ana abotoro. Ma e aki ikotiia ni kabane taan rimwina mai Iuta, Kariraia, ao Berea ibukini bukamaruan te Toa ae te Riao. E teretere iai bwa e bon tii kan ikotaki ma ana abotoro n te tai anne. E kangai nakoia: “I a kamani kani kana amwaraken te Toa ae te Riao aei ma ngkami imwain ae I kammarakaki.”—Ruka 22:15.

Iai bukina ae raoiroi ngkai e karaoa anne. E nangi mate Iesu bwa “ana Tiibutetei te Atua, ae kamaunai aia bure kaain te aonnaba.” (Ioa. 1:29) E na riki anne i Ierutarem, are e bobo iai te angakarea nakon te Atua. E karekea te kainaomataaki ae kakannato riki maten Iesu, nakon are e reke man te tiibutetei are a kanna tibun Iteraera n te tairiki are a Otinako iai mai Aikubita. (1Kor. 5:7, 8) Te baere e karaoia Iesu arei, e a kariaia iai naake Tengaun ma Uoman bwa a na riki bwa aan te ekaretia ni Kristian. (IEbe. 2:20-22) E kakaongora bwa n te Ierutarem are te kaawa ae tabu, iai naba “iai atibu aika 12 aika a aana oon te kaawa” ae a mwakoro “aara aika 12 i aoia, ake araia ana abotoro te Tiibutetei ake 12.” (TeKao. 21:10-14) Eng, bon iai mwiokoaia ae kakawaki abotoro ake a kakaonimaki, ni kaineti ma kakororaoan ana kantaninga te Atua. Ngaia are e boni mataata bwa bukin tera ngke e kan ikotaki Iesu ma ngaiia n ana kabanea n Toa ae te Riao ao imwina riki n Ana Katairiki te Uea.

A aki ira te katairiki anne taan rimwina ake 70 ao ake tabeman riki. Ma a na bane ni kakabwaiaaki taan rimwina aika kakaonimaki ni kabane man Ana Katairiki te Uea are e moani karaoia Iesu. A bane taan rimwini Kristo aikai n riki bwa Kristian aika kabiraki imwina riki, ao ni kaaina te berita ibukin te tautaeka n uea, are e taekinna Iesu nakoia abotoro.—Ruka 22:29, 30.