Ko Ataia?
Bukin tera ngke a beku ianena n ana taanga ni buaka te Uea are Tawita?
TABEMAN i buakoia taani buaka aika ianena n ana taanga ni buaka Tawita, bon Tereka are tibun Ammon, Uria are tibun Eta, ao Itema are te I-Moaba.a (1Rong. 11:39, 41, 46) Kaain naba ana taanga ni buaka Tawita bon “taiani Keritaite, taiani Beretaite, ao I-Kate.” (2Tam. 15:18) A iangoaki taiani Keritaite, ao taiani Beretaite bwa aia koraki ni kaan I-Biritia. (Etek. 25:16) A roko I-Kate mani kaawani Biritia ae Kate.—Iot. 13:2, 3; 1Tam. 6:17, 18.
Bukin tera ngke e karinia ianena Tawita n ana taanga ni buaka? E kakoauaa raoi bwa a boni kakaonimaki ni koaua nakoina ao ae kakawaki riki nakon Iehova. N te katoto, e taekinaki ae kangai n te Rikitinare teuana n te Baibara ibukia taiani Keritaite ao taiani Beretaite: “A teimatoa ni kakaonimaki ni koaua nakon Tawita ngke e uea n taai aika rangi ni kangaanga.” A kangaa ni karaoa anne? Ngke a bane “mwaane aika tibun Iteraera” ni kitana te Uea are Tawita ao n ira “te tia karika te kangaanga ae arana Tieba,” ao taiani Keritaite ao taiani Beretaite a kakaonimaki ni koaua nakon Tawita ao ni buoka katokan ana karitei Tieba. (2Tam. 20:1, 2, 7) N te tai teuana, e kataia Natin Tawita are Atoniia n taua te kaintokanuea. Ma a teimatoa ni kakaonimaki ni koaua nakon Tawita taiani Keritaite ao taiani Beretaite ao ni buoka kaueaan Toromon, are ngaia are e rineaki iroun Iehova bwa e na ruamwin te uea.—1Uea 1:24-27, 38, 39.
Te ianena riki temanna ae teimatoa ni kakaonimaki ni koaua nakon Tawita bon Itai are te I-Kate. A boutokaa te Uea are Tawita Itai ma ana tia buaka aika 600 ngke e karitei natin Tawita are Abetarom ao n anai nanoia mwaane aika tibun Iteraera ni kaitaraa te uea. E waekoa Tawita n tuanga Itai ae ngkai te ianena ngaia, e aki riai ni buaka ibukina. Ma e taku Itai: “Ngkai bon iai Iehova, ao ngkai e boni maiu au toka ae te uea, ao ike e mena iai au toka ae te uea, bwa tao te mate ke te maiu, ao e na mena naba iai am toro!”—2Tam. 15:6, 18-21.
E kakaonimaki ni koaua Itai nakon Tawita, ae te uea are ana kabiraki Iehova
E ngae ngke ianena taiani Keritaite, taiani Beretaite, ao I-Kate, ma a ataia ae bon te Atua ae koaua Iehova ao Tawita bon ana kabiraki Iehova. Ai kakaitaura Tawita irouia mwaane aika kakaonimaki ni koaua aikai aika tei n ana itera!
a A aki kariaiakaki tibun Ammon ao tibuni Moaba n ana tua te Atua are e koreaki n Te Tua-Kaua 23:3-6 bwa a na kaaina te botaki n aomata aika tibun Iteraera. Ma n taraana, e kaineti te tua aei nakoni kaainakin raoi te natannaomata ao e aki tukiia ianena aikai bwa a na ikoikotaki ke ni maeka i buakoia ana aomata te Atua. Nora te Insight on the Scriptures, Volume 1, i. 95 n te taetae n Ingiriti.