Aia Taeka Aomata Ibukin te Tataro
“Ngkana I tataro, ao I namakinna bwa ai aron ae e mena i rarikiu te Atua, e taua baiu ao ni kairirai, n taai ake I a aki ataa iai te bae N na karaoia.”—MARÍA.
“E motirawa buu imwin ana kabokorakora ma te kaentia i nanon 13 te ririki. I uringnga ae I katoabong n tataro nakon te Atua ao I namakinna ae e bon nora marakiu. I namakina te rau.”—RAÚL.
“Te tataro bon ana bwaintangira ae tamaroa te Atua nakoia aomata.”—ARNE.
A kakoauaa María, Raúl, Arne, ao aomata riki aika bati, bwa te tataro bon te bwaintangira ae okoro. A namakinna bwa rinanon te tataro, a a kona iai n taetae ma te Atua, ni kaitaua, ao ni butiia ana ibuobuoki. A kakoauaa raoi ana karaunano te Baibara ni kaineti ma te tataro nakon te Atua are e kangai: “Ti aki nanokokoraki iroun te Atua n aei, bwa ngkana ti bubutiia te bwai teuana ae boraoi ma nanona ao e bon ongo iroura.”—1 Ioane 5:14.
N te itera are teuana, a bati aomata aika a aki kakoauaa ana taeka te Baibara aei ibukin te tataro. E uringa ana namakin Steve ibukin te tataro ao e taku: “Ngke e koro 17 au ririki, ao a a mate naba raoraou aika teniman. E kurati are temanna n te kaa, ao ake uoman a bwabwa i taari.” Tera are e karaoia Steve? “I tataro nakon te Atua bwa bukin tera ngkai e riki aei, ma e bon aki kaekaai. Ngaia are I a taku, ‘Tera uaan te tataro?’” N taraana, ao a bati aika a raraoma bwa iai uaan te tataro ke akea, kioina ngkai a aki kaekaaki aia tataro.
Iai naba aika nanououa ni kakawakin te tataro i aani bukina riki tabeua. A taku tabeman bwa kioina ngkai e atai bwaai ni kabane te Atua, e bon riai naba ni kaman atai baika ti kainnanoi ke ara kangaanga, ngaia are bon akea uaani manga tuangana.
Tabemwaang a kakoauaa ae e rawa te Atua n ongoraei aia tataro ngkana a a tia ni karaoa ae kairua. E taku Jenny: “Au kangaanga ae buburakaei, bon namakinan ae akea bongau. A bati baika I karaoi aika I uringaaba iai, ngaia are irou e bon aki riai te Atua n ongoraei au tataro.”
Tera ngkoe am iango ibukin te tataro? Ngkana ko a tia naba n tabeaianga ke n raraoma n aroia naakai, ko kona ni kabebetea nanom bwa e kona te Baibara n anganiko kaeka aika karaunano. Ti kona n onimakini baika e taekin te Baibara ni kaineti ma te tataro,a ao e kona ni buokiko ni kaekai titiraki aika ai aron aikai:
E bon ongoraei ara tataro te Atua?
E aera ngkai a aki kaekaaki tataro tabeua?
E na kangaa n ongoraeaki am tataro?
Ko na kangaa ni buokaki man te tataro?
a Iai n te Baibara aia tataro ana toro te Atua aika bati, n ikotaki naba ma ana tataro Iesu Kristo. Iai n te Baibara n Ebera, ae ataaki n arana ae te O Tetemanti, tataro aika raka i aon 150 mwaitiia.