Titiraki Mairouia Taani Wareware

E kaineti Te Minita 5:8 nakoia taan tautaeka aika aomata ke e irekereke naba ma Iehova?

E kangai taekan te kibu aei: “Ngkana ko nora karawawataaia akana maiu ni kainnano, ao uruan te kaetitaeka ae riai ma te raoiroi n am aono, ao tai mimi iai. Bwa e tarataraaki te mataniwi ane rietata anne iroun ae e rietata riki nakoina, ao bon iai riki tabemwaang aika rietata riki nakoia.”​—TeMin. 5:8.

Ngkana ti taraa te kibu aei, ti kona n iangoia bwa taekaia aomata aika iai mwaakaia ni kairiri n te tautaeka. Ma ngkana ti karaua n iangoia, e bon taekina naba te koaua ibukin Iehova, ae e karauaki nanora iai.

E kaineti Te Minita 5:8 nakon te tia tautaeka ae karawawataia akana maiu ni kainnano ao e ribuaka nakoia. E riai te tia tautaeka anne n uringnga ae e boni bae n tataraaki iroun temanna ae rietata riki nakoina, ke ae bubura riki nakoana n te tautaeka. Ni koauana, tao bon iai naba aika rietata riki nakoaia. Ma e kananokawaki bwa a kona ni bane ni babakanikawai taani kairiri n aia tautaeka aomata n te aro are a a karawawataaki aomata n aia babakanikawai.

Ma e ngae ngke e karawawata te waaki, ti kona ni kabebeteaki n ataakin ae Iehova e bon ‘tataraiia naba mataniwi aika rietata’ n aia tautaeka aomata. Ti kona ni bubutiia te Atua ao ni kaaki rawawatara i aona. (TaiAre. 55:22; IBir. 4:6, 7) Ti ataia bwa “a biribiri matan Iehova n te aonnaba ni kabutaa, bwa e na kaota korakorana ibukia te koraki ake a tabwanin raoi nanoia nakoina.”​—2 Rong. 16:9.

Ngaia are e kauringira Te Minita 5:8 te bwai ae bon riiriki n aia tautaeka aomata, ae bon iai n taai nako ae rietata riki nakoana. Ma ae kakawaki riki, e buokira te kibu anne bwa ti na iaiangoa ae Iehova bon te kabanea n rietata n te aonnaba ni kabutaa. E a tautaeka ngkai rinanon Natina ae Iesu Kristo, ae te Uea n te Tautaeka n Uea. Eng, e boni kaetitaeka n te riai ao e aki ribuaka Teuare tarataraiia aomata nako ao ai uana naba ma Natina.