MAIURA NI KRISTIAN
Neboa Iehova n Arom ni Bwaiania
Iai bukina aika kakawaki irouia I-Iteraera ngkai a neboa Iehova. E kaotinakoia mai Aikubita ao e kamaiuia mairoun ana taanga ni buaka Barao! (TO 15:1, 2) E teimatoa Iehova ni karaoa ae raoiroi nakoia ana aomata. Ti na kangaa n kaota ara kakaitau?—TA 116:12.
Te anga teuana bon te beku bwa te bwaiania ae aki katoatai ke ae katoatai. Ko kona n tataro ibukin uaiakinana ke te korakora bwa ko aonga ni beku bwa te bwaiania. (Brb 2:13) A bati ake a moanna moa man te bwaiania ae aki katoatai. Ko kona n rinea 30- ke 50- te aoa ae baireaki n namwakaina aika Maati ao Eberi ao n te namwakaina are roko iai n am ekaretia te mataniwi n te aono. Imwin norani kakimwareirein te beku bwa te bwaiania ae aki katoatai, ko na bae ni kani manga kataa te beku bwa te bwaiania ae katoatai. Iai naba aika kabwanina aia tai ni mwakuri ni kareketianti ke aika iai aorakin rabwataia ake a a tia ni kona ni beku bwa bwaiania aika katoatai. (mwb16.07 8) Ti bon tau ni kabanea korakorara n neboa Iehova!—1Ro 16:25.
MATAKU N TE TAAMNEI AE TAARI AINE AIKA TENIMAN I MONGOLIA, AO KAEKAI TITIRAKI AIKAI:
Baikara kangaanga ake a kekeiaki ma ngaai taari aikai bwa a aonga n riki bwa bwaiania?
Baikara kakabwaia ake a karekei?
Baikara kakabwaia ni kaineti ma aia beku ibukin Iehova ake a a uki nakoia, ngkai a beku bwa bwaiania aika katoatai?
Tera aron rotakia tabemwaang man aia katoto?