Ko Karekea Kakabwaiaam Man Neneran te Baibara ni Katoabong?

Iai i buakon am babaire ibukini bwaai n taamnei warekan te kibu ibukin te bong ao kabwarabwaraana n Neneran te Baibara ni Katoabong? Ngkana akea, ko kona ni karinna i buakon am babaire? A bati aika a rinanona n te moaningabong bwa a aonga n iaiangoa kanoan te kibu ngkana a karaoi tabeia n te bong anne. (Iot 1:8; TA 119:97) Ko na kangaa ni karekea riki kakabwaiaam man te Kibu ibukin te bong? Wareka bwaninin rongorongon te kibu anne man te Baibara bwa ko aonga n ataa rongorongona. Kataia n iangoa te rongorongo teuana man te Baibara ae kamataataa te boto n reirei n te kibu anne. Imwina maiuakina te boto n reirei anne. Ngkana a boto am motinnano man Ana Taeka te Atua, e na kaetieta kawaim ao ko na boni kakabwaiaaki.​—TA 119:105.

A rinanon Neneran te Baibara ni Katoabong utu ni Betaera ni katobibia te aonnaba n tain te kaingabong. N ririki aika tibwa nako, a bati kabwarabwaraan te kibu n te bong aika katokaaki n te JW Broadcasting^® i aan TAIANI KAETIETI AO BAIKA RIKI. N ningai am kabanea n tai ae ko rinanon teuana mai iai, ke e bati riki? Tao tabeua mai iai bon te reirei ae ko kainnanoia. N te katoto, tera aron rotakin am motinnano n rongorongon Rota?

MATAKU N TE TAAMNEI AE TAI TANGIRA AIA WAAKI KAAIN TE AONNABA (1IO 2:15), AO KAEKAI TITIRAKI AIKAI:

• Tera te boto n reirei man te Baibara ae aanaki iai te maroro n te Kibu n te Ingabong aei?

• E kangaa rongorongon Rota ni kamataataa karuanikain tangiran aia waaki kaain te aonnaba ke waakina nako?​—KB 13:12; 14:12; 19:3, 12, 13, 24-26

• Ti na kangaa ni kaotia bwa ti tangira Iehova ao tiaki aia waaki kaain te aonnaba ke waakina nako?