“E Kaitaua te Atua [Bauro] ao E Kaungaaki Nanona”

Ngke a ongo kaain te ekaretia i Rom bwa e nang roko Bauro, a mwananga taari aika bati n te raroa ae tao 40 tabun te maire (64 te kiromita) bwa a na kaitiboo ma ngaia. E kangaa n rotaki Bauro ni kaotan aia tangira are a anga ngaiia iai? “Ngke e noriia Bauro, ao e kaitaua te Atua ao e kaungaaki nanona.” (Mwa 28:15) E ngae ngke e ataaki Bauro n arona ae e kakaungaia ekaretia ake e kawari, ma n te tai aei ngke e kabureaki, e a kaungaaki.​—2Ko 13:10.

Ni boong aikai a kawari ekaretia teuana ma teuana mataniwi n te aono ibukini kateimatoaaia taari. N aroia ana aomata ni kabane te Atua, n tabetai a rinanon te kua, te tabeaianga, ao te bwarannano. Ngkana e a manga roko te mataniwi n te aono ma buuna n am ekaretia, tera ae ko kona ni kaungaia iai bwa e aonga n reke ‘te ikaungaunga i marenami’?​—Ro 1:​11, 12.

• 

  Boutokaa te mwakuri ni minita. E kaungaaki te mataniwi n te aono ngkana a anga ngaiia taan uarongorongo bwa a aonga ni kakabwaiaaki riki man te wiki ni mwakuri ane okoro anne. (1Te 1:​2, 3; 2:20) Iangoa karaoan te mwakuri ni bwaiania ae aki katoatai n te namwakaina are e roko iai. Ko kona n toa ma ngaia ke buuna n te mwakuri ni minita ke n airi ma temanna irouia nakon am reirei n te Baibara? A rangi ni kukurei ni mwakuri ma taan uarongorongo aika kakaokoro, n ikotaki naba ma aika boou ke aika a taku bwa a tuai ni mwaatai n te uarongorongo.

• 

  Te kakairuwa. Ko kona ni kamaekaia n am auti ke ni kaamwarakeia? E kaotaki n aei am tangira nakon te mataniwi n te aono ma buuna. A aki kantaningaa katauraoani baika bati.​—Rk 10:​38-42.

• 

  Kakauongo raoi n ana reirei ni kaetieti ma ana kairiri ao kakairi iai. E tatangira ni buokira te mataniwi n te aono bwa ti na kanakoraoa riki ara beku ibukin Iehova. N tabetai, e kona n anga te reirei ni kairiri ae matoatoa. (1Ko 5:​1-5) E kimwareirei ngkana ti ongeaba ao n aantaeka.​—Ebr 13:17.

• 

  Kaota am kakaitau. Taekina aroni kakabwaiaam nakon te mataniwi n te aono ma buuna man aia kakorakora. Ko kona ni karaoa aei ngkana ko bon taetae nakoia ke n te reta.​—Kor 3:15.