Tera Reireiara Man te Baibara?​—Aroni Kabonganaana

E kuri n titeboo te boki ae Reireiara Man te Baibara ao te boki ae Ana Reirei te Baibara. Boni bwaai ni mwakuri aikai man ara bwaoki n angareirei ake iai i nanoia koaua aika tii te arona ao titeboo naba baireaia. Ma a kabonganaaki n te boki ae Reireiara Man te Baibara, taeka aika bebete riki ao a mataata. E karaoaki ibukia naake e kangaanga otaia n te boki ae Ana Reirei te Baibara. N oneani mwin te bukinibaa, iai n te boki ae Reireiara Man te Baibara te atu ae kabwarabwaraana riki, ae kamataatai nanon taeka ao koaua tabeua n taiani mwakoro. Akea taian titiraki mai moa ke te bwaoki ni kauring n taiani mwakoro. Ma iai kakimototoani koaua man te Baibara ni banen taiani mwakoro. Ti kona n anganako te boki ae Reireiara Man te Baibara n te tai teuana ma teuana n aron naba te boki ae Ana Reirei te Baibara, e ngae naba ngkana tiaki taina n tibwaaki n te namwakaina anne. Ti na kangaa ni kabonganai kanoan Reireiara Man te Baibara aika okoro ngkana ti kaira te reirei n te Baibara?

KAKIMOTOTOANA: E teimatoa n nakoraoi naba ibukia angia aomata ara anga ae ti kakaraoia ni kairan te reirei, ae warekan te barakirabe n te boki ae Ana Reirei te Baibara ao imwina tabekan te titiraki. Ma iangoia bwa aongkoa e aki ota raoi n te taetae te aomata are ko reirei ma ngaia ke e kabi ni wareware. Ngkana e riki anne, ko kona ni kabongana te boki ae Reireiara Man te Baibara. E kona ngkanne ni kabonganaaki te atu ae kakimototoana ibukini kairan te reirei, ao e na kaungaaki te aomata are reirei bwa e na rinanoi mwakoro i bon irouna. N angiin te tai, a kona n rinanoaki koaua man te Baibara ni kabane n tain te reirei, tao n te maan ae 15 te miniti. Kioina ngkai a aki karinaki kabwarabwaraan te mwakoro anne ni kabane i aan te atu ae kakimototoana, e bon riai te tia reirei ni katauraoi raoi ao n iaiangoi baike e kani buokaki iai ana aomata anne. Ma ngkana e waakina te reirei man te mwakoro anne te tia reirei, e kona n rinanon te atu ae kakimototoana bwa te bwai ni kauring.

KABWARABWARAANA RIKI: A baireaki raoi nanon taeka ao koaua n te atu ae kabwarabwaraana riki n aron ae kaotaki n te mwakoro teuana ma teuana. E kona te tia reirei ni baireia bwa e na rinanon te atu ae kabwarabwaraana riki n te boki ae Reireiara Man te Baibara, n tain te reirei ke e na aki.