Kainnanoan te Katauraoi Ngkana Ko na Mwaatai n Angareirei

E titirakinaki Iesu taekan te maiu n aki toki n taai aika uoua, ma e katoatai ni kaangaraoa ana kaeka ma te baere e kan ataia te tia titiraki. (Ruka 10:25-28; 18:18-20) Ngaia are e ngae ngke ti ataa raoi kanoan te boki are ti reirei iai n te Baibara, ma ti bon riai ni kamani katauraoi ma iaiangoan te aomata are ti reirei ma ngaia. Baikara bwaai ake e bae ni kangaanga otana iai ke butimwaeana? Kiibu raa aika kaotaki ake ti riai ni wareki ma ngaia? Mwaitira te reirei ae ti na kataia ni kabanea? Ti na bae ni kainnanoa katauraoan te kaikonaki, te kabwarabwara, ke titiraki riki tabeua ake a na buokia ni karekea otana n te reirei. Irarikin anne, kioina ngkai bon Iehova ae karikirakea koraan te koaua n te nano, ti riai ni butiia ana kakabwaia ibukin ara katauraoi imwain te reirei, ibukin te aomata are ti reirei ma ngaia ao ibukin ara kakorakora ni buokia n ana onimaki.​—1Kor. 3:6; Iak. 1:5.