Kairan te Reirei n te Baibara n te Aro ae Uaana
1. Tera tabeia taan uarongorongo ake a kairi reirei n te Baibara?
1 Akea te aomata ae kona ni beku iroun Iehova ngkana E aki “katikia” nakoina. (Ioa. 6:44) E ngae n anne, a riai taan uarongorongo aika kairi reirei n te Baibara ni karaoa raoi tabeia ni buokiia aomata bwa a na kaaniaki ma Tamaia are i karawa. (Iak. 4:8) E kainnanoaki te katauraoi i aon aei. E aki tau tii warekani barakirabe ao tabekan te titiraki ibukini buokaia bwa a na ota raoi n te rongorongo ao ni waekoa n rikirake.
2. Tera ae e na kakororaoaki ni karaoan te reirei n te Baibara n te aro ae uaana?
2 Ibukini kairan te reirei n te aro ae uaana, a riai taan uarongorongo ni buokiia aomata aika reirei ma ngaiia bwa (1) a na ota n ana reirei te Baibara, (2) a na butimwaea ana reirei te Baibara, ao (3) a na maiuakina ana reirei te Baibara. (Ioa. 3:16; 17:3; Iak. 2:26) E kainnanoaki te tai ae maan ibukini kairan temanna bwa e na karaoi mwaneka aikai. Ma e ngae n anne, a kaotaki ni mwaneka akanne aron rikiraken ana iraorao ma Iehova ao karaoan ana katabu nakoina.
3. Bukin tera ngkai a tabeki titiraki aika kammwakura te iango taan angareirei aika rabakau?
3 Tera Ana Iango te Aomata ae Reirei n te Baibara?: Ngkana ti kan ataia bwa e ota te aomata anne ao ni butimwaei baike e reiakin, ti riai n aki taua angiin te maroro ma ti na kaungaa bwa e na kaota ana iango. (Iak. 1:19) E ota n te bwai ae taekinaki n te Baibara ni kaineti ma te reirei are rinanoaki? E kona ni kabwarabwaraa te reirei n oin ana taeka? Tera ana iango n te baere e reiakinna? E kakoauaa bwa a bon eti ana reirei te Baibara? (1Tet. 2:13) E ota bwa te reirei are e reiakinna, e kona ni karekea te bitaki nakoni maiuna? (IKoro. 3:10) Ibukini kaekaan titiraki akanne, ti riai n rabakau n tabeki titiraki aika kammwakura te iango ao imwina ti na kakauongo raoi.—Mat. 16:13-16.
4. Tera ae e riai ni karaoaki ngkana e kangaanga iroun te aomata ae ti reirei ma ngaia butimwaean ke maiuakinani baike e reiakin n te Baibara?
4 E kona ni kangaanga n angiin te tai bitakin anuan ao aeka n iango aika tataneiai iai aomata ao e kainnanoaki te tai ae maan ibukini mwanuokaia. (2Kor. 10:5) Ma tera arora ngkana e aki butimwaea ke ni maiuakini baike e reiakin te aomata ae ti reirei ma ngaia? E kainnanoaki te taotaonakinnano bwa ti na kariaia te tai ae tau ibukin Ana Taeka te Atua ao te taamnei ae raoiroi bwa e na mwamwakuri i nanon te aomata anne. (1Kor. 3:6, 7; Ebera 4:12) N oneani mwin ae ti na kairoroia, e tamaroa riki ngkana ti nakon te reirei teuana ngkana e kangaanga irouna butimwaean ke maiuakinan te reirei n te Baibara. Ma e kona ni kairaki bwa e na karaoi bitaki ni maiuna imwin tabeua te tai ngkana ti kateimatoa reiakinana man te Baibara ma te taotaonakinnano ao te tangira.