“I Aki Kona ni Manga Kaitiboo ma Ngaia ni Mwengana!”

Ko a tia n tataekina anne ibukin temanna ae kaota te kan ongora? E ngae ngke ko a tia ni kataia n okioki ni kawara te aomata anne, ma ko a aikoa kona n teboteboka koraan te koaua are ko a tia n unikia. (1 Kor. 3:6) N tabetai, taan uarongorongo aika mwaatai a kororeta nakon temanna ae a aki kona ni kaitiboo ma ngaia ni mwengana, ke a katuka te reta ae uarereke n ana mataroa te aomata anne. Tabeman taan uarongorongo a kantaningaia bwa e na kangaanga ae a na kaitiboo riki ma te aomata ni mwengana ao a bubutii nambwan ana tareboon, ngkana a tuatua, “Ko kakanakorongorongo n te tareboon?” E riai n tauaki mwin manga okiran temanna ke n uarongorongo nakoina rinanon te reta, te meri, te kanakorongorongo n te tareboon, te reta ae uarereke ae katukaki n ana mataroa te aomata, ke n tareboon nakoina. E ngae ngkana e aki titiku ni mwengana, ti kona naba n reitaanako kan ongorana.