Te Tienture Ibukini Katanoataakin te Tautaeka n Uea!

¹ “Noria, e a uea te Uea! Bon taan tataekina rongorongona ngkami. Mangaia are kaotiota, kaotiota, kaotiota te Uea ao ana tautaeka n uea. A a kaungaaki ana aomata Iehova bwa a na katanoataa rongorongon te Tautaeka n Uea n taabo ni kabane man taeka aika kaunganano ake e taekin Brother  Rutherford, e kaania te tienture n nako. Ao anne ae ti a tia ni karaoia! Ti tataekina naba te rongorongo ae raoiroi ibukin te Tautaeka n Uea “n taabo nako aika i aani karawa,” n aroia Kristian rimoa. (IKoro. 1:23) Ngkana ti ururing rikaaki nakon tebubua te ririki n nako, tera ae ti a tia ni karaoia ni katanoataan Ana Tautaeka n Uea te Atua? Ti na kanga ni kateimatoa katanoataakin te Tautaeka n Uea ae ai 100 te ririki maanna n tei?

2. E kanga ni boutokaaki Ana Tautaeka n Uea te Atua n ara boki?

² Ngkana Ti Ururing Rikaaki: Inanon ririki aika bati ao e a tia ni boutokaaki tataekinan Ana Tautaeka n Uea te Atua man ara boki. Man te ririki 1939 ao e a reke aran ara bwai ni mwakuri ae rangi ni kakawaki ae te maekatin bwa Te Taua-n-Tantani ae Tataekina Ana Tautaeka n Uea Iehova. E aki toki ni kabwarabwaraaki n te maekatin aei te Tautaeka n Uea ao te bwai ae na kakororaoia. E katuruturuaki naba n te maekatin ae te Awake! bwa bon tii te Tautaeka n Uea te kantaninga ni koaua ibukia aomata. A tonuraoi maekatin aika uoua aikai bwa bon taiani kabanea ni butanako ao n tibwaaki nako n te aonnaba!​—TeKao. 14:6.

3. Baikara aanga tabeua ake ti a tia ni kamanenai ibukini katanoataan te Tautaeka n Uea?

³ A a tia ana toro Iehova ni kamanenai aanga aika kakaokoro ibukini katanoataan te Tautaeka n Uea. N taai ake ngkoa ao ti kabonganai tibika aika bubura aika katokaki ni kaa, kanakorongorongo n te rerio ao ai kuramaboon aika uouotaki. Man aanga akanne ao ti a buokaki iai ni kabutanakoa te rongorongo ae raoiroi nakoia aomata aika bati n te tai teuana are e karako iai mwaitiia taan tataekina te Tautaeka n Uea. (TaiAre. 19:4) N ririki aika nako ao ti a tia ni karina te rongorongo n te jw.org are e a tataekinaki iai te Tautaeka n Uea nakoia mirion ma mirion, n ikotaki naba ma aomata ake a maeka n taabo ake e katabuakaki iai te mwakuri n uarongorongo.

4. Tera te mwakuri ae okoro ae ti boutokaa karaoana?

⁴ A tia naba ana aomata Iehova n uataboa te mwakuri ae okoro ibukini kabutanakoan rongorongon te Tautaeka n Uea. N te katoto, ni moa man nukan 1990 tabun ao ti kakorakoraira ni karababaa nako te mwakuri n uarongorongo man te auti teuana ma teuana n taabo ake a mena iai aomata, taabo ni kamaangang ao taabo ni bitineti. N taai aikai ao ti a tia ni bairea te mwakuri ae okoro n ana tabo te botannaomata n te aono ae bubura ni katobibia te aonnaba. Irarikin anne, a mwaiti ekaretia ake a uataboa te uarongorongo n ana tabo te botannaomata n ara aono ni kabonganai kaa ibukini booki aika uarereke ao taibora ake a katokaaki iai booki ao ni kateaki n taabo ake a aki toki n nanakonako iai aomata. Ni koauana, ti teimatoa ni karaoa te mwakuri man te auti teutana ma teuana bwa te anga ae te kabanea ni kakawaki ibukin uarongorongoan te Tautaeka n Uea.​—Mwa. 20:20.

5. Baikara aanga aika tauraoi ibukira n te ririki ni mwakuri ae boou?

⁵ Ngkana Ti Taratarai Taai Aika Imwaira: Ni moan te ririki ni mwakuri n Tebetembwa ao a bati aika a na moana aia beku bwa regular bwaiania. Ko kan iria naba ngkoe. Ngkana ko aki, ko kona n auxiliary bwaiania n te tai teuana ma teuana? E ngae ngkana ko kona ni bwaiania ke ko aki, ma e na boni kakabwaiaa am anganano Iehova ni karaoan am kabanea ni kona n tataekina te Tautaeka n Uea.​—Maraki 3:10.

6. Bukin tera ngkai e na rangi ni kakawaki te namwakaina ae Okitobwa 2014?

⁶ N te namwakaina ae Okitobwa 2014 ao e na kanikinaeaki iai te Tautaeka n Uea bwa ai 100 te ririki manna n tei. E tonuraoi ngkanne Te Taua-n-Tantani ibukia aomata bwa te namwakaina ae kaatuuaki iai taekan Ana Tautaeka n Uea te Atua. E aera bwa ko aki kakorakorako ni karokoa te maekatin aei nakoia aomata aika bati? Ngkai ti tarai taai aika imwaira ao ti bia teimatoa n tatabemanira nako n “tataekina te rongorongo ae raoiroi ibukin Ana Tautaeka n Uea te Atua” nakoia ake a kan ongora.​—Mwa. 8:12.