Arora ni Buokiia Aomata Aika Babanga ni Wareware

¹ A kona n anaaki nanoia kaain te auti aika babanga ni wareware bwa a na kan ongora ni baika irekereke ma te onimaki, ma a kona ni maaka te Baibara ao booki tabeua kioina ngkai e kangaanga irouia te wareware. E kona n aki nakoraoi aia reirei n te moantai are ti angania iai te boki ae Ana Reirei te Baibara. Ti na kanga ni buokiia aomata aikai bwa a na rikirake n te onimaki? Ti a tia n titirakinia taan uarongorongo aika mwaatai man aaba aika kakaokoro aika raka i aon 20 ni kaineti ma aroia ni karaoa anne. A kaotaki baike a karaoi i nano.

2. Baikara bwaai ni mwakuri aika uaana ibukini buokan te aomata ae babanga ni wareware?

² Ngkana e uarereke ke bon akea ana konabwai ni wareware te aomata ae reirei n te Baibara, ko kona ni moana te reirei ma ngaia ni kamanenaan te boroutia ae Ongeaba Iroun te Atua ke Ongeaba Iroun te Atua ao Ko na Maiu n Aki Toki. E kaotii boroutia aikai temanna te bwaiania i Amerika nakon te aomata temanna ao n tuangnga bwa e na rinea teuana mai iai ae nakoraoi riki irouna. E ribootinna te aobiti n tararua i Kenya bwa a bane n uaana bwaai ni mwakuri aikai n te tabo anne, ibukina bwa i aon Aberika ao a reiakinaki aomata rinanoni karaki n oneani mwin tabekan titiraki ao ni maroroakini kaekaaia. E ngae ngke e bebete iroun te aomata ae reirei butimwaean te wareware ao maroroakinan titiraki, ma e kona n aki tauraoi ni butimwaea anne temanna ae uarereke ana reirei. A a bati taan uarongorongo aika tangiria ni moana te reirei ma te aomata n te boroutia ae Te Rongorongo ae Raoiroi Mairoun te Atua!, Ko Kona n Riki Bwa Raoraon te Atua! Ke tao Karaki Man te Baibara ngkana iai ana konabwai ni wareware.

3. Tera arora ae riai ni kaineti ma aomata aika babanga ni wareware ae ti na buokaki iai n reireinia n te aro ae uaana?

³ Kamoamoaia: A kona n namakina te maamaa aomata aika babanga ni wareware ao a bati aika a iangoia bwa akea uaaia. Te moani mwaneka ae kakawaki n taai nako boni buokaia bwa a na rau nanoia ngkana ti reiakinia te koaua. Angiia aomata aika babanga ni wareware, bon iai wanawanaia ao a kona n reireinaki. Kaotiota te karinerine ao tabeakinaia. (1 Bet. 3:15) A na anaaki nanoia n reitaanako aia reirei ngkana a namakinna bwa e uaana aia kakorakora ao n rikirake n te onimaki. Ngaia are kaota te akoi ni kamoamoaaia.

4. Ti na kanga ni kaungaia te koraki aika e uarereke aia konabwai ni wareware bwa a na katauraoi ibukin te reirei?

⁴ Kaungaa te aomata ae reirei n te Baibara bwa e na katauraoi ibukin ana reirei, e ngae naba ngkana e uarereke ana konabwai ni wareware. Tabeman taan uarongorongo i Aberika Maiaki, a kaungaia aomata aika reirei ma ngaiia n te Baibara bwa a na tuangia kaain aia utu ke raoraoia aika kona ni wareware ibukini buokaia. E kaungai nanoia aomata aika e reirei ma ngaiia n te Baibara, te tia uarongorongo temanna i Buritan ni kariaia bwa a na kabongana ana boki n tain te reirei ibukini barakirabe tabeua bwa a aonga n ataia ae e bebete kakaaeani kaeka ngkana a kanikinaeaki. E kaungaia aomata aika e reirei ma ngaiia n te Baibara temanna te tari i Inria bwa a na matakuakin taian taamnei ae kanoan te reirei ibukin te wiki are imwina bwa a aonga ni moantaai ni kananoa aia iango iai.

5. Ti na kanga ni kaotiota te taotaonakinnano ngkana ti kaira te reirei n te Baibara?

⁵ Bwaina te Taotaonakinnano: N aki ongeia bwa te boki raa ae ko kabongana, kaatuua am iango i aon reirei aika kakawaki ao buoka ae ko reirei ma ngaia bwa e na ota raoi n reirei akanne. E nakoraoi te maroro ae kimototo ae tao 10 nakon 15 te miniti manna ni moan te waaki. Tai iangoia ni kabatiaa te reirei n te tai teuana, tao tii tabeua te barakirabe ni katoaa tain te reirei. Bwaina te taotaonakinnano ngkana e wiremwe ni wareware te aomata anne. E na bae n anaaki nanona bwa e na katamaroa aroni konabwaina ni wareware ao ni karikirakea naba ana kakaitau ibukin Iehova. Ibukini buokana ni karaoa anne, e raoiroi riki ngkana ko kaoa nakon te botaki man te moantai are ko moana iai am reirei ma ngaia.

6. Ti na kanga ni buokiia tabeman bwa a na rabakau ni wareware?

⁶ Ngkana a reiakina aroia ni wareware aomata aika reirei n te Baibara, a na waekoa n rikirake iai n te onimaki. (TaiAre. 1:​1-3) A a bati aika tia ni buokiia aomata ake a reirei ma ngaiia n te Baibara ni kabongana te boki ae Apply Yourself to Reading and Writing i nanon tabeua te miniti ni katoaa tokin aia reirei. Ngkana e bwara nanona, tao ko kona ni karikirakea ungan nanona n taekinani bwaai tabeua ake e a tia ni karaoi. Karaua nanona bwa e na boni kakabwaiaa ana kakorakora Iehova ao kaungaa bwa e na tataroakina buokana. (TaeRab. 16:3; 1 Ioa. 5:14, 15) A a tia taan uarongorongo tabeman i Buritan ni kaungaia aika reirei ma ngaiia bwa a na katei tiaia aika uaana tao ni moan reiakinani manin taeka, imwina kakaaean ma warekani kiibu aika katauraoaki ao te kabanea warekani booki aika aanaki man te Baibara aika bebete warekaia. E irekereke n angiin te tai buokaia aomata ni wareware ma kaungaaia bwa a na kani karaoia, ao tiaki tii aroia ni reiakinna.

7. Bukin tera bwa ti na aki rawa ni kaota te koaua nakoia te koraki aika babanga ni wareware?

⁷ E aki kakeai bongaia te koraki aika uarereke aia reirei Iehova. (Iobi 34:19) E bon ukeri nanoia aomata Iehova. (1 Rongo. 28:9) Ngaia are tai rawa ni kaota te koaua nakoia te koraki aika babanga ni wareware. A bati bwaai ni mwakuri aika rangi n ibuobuoki ae ko kona ni kamanenai. N tokina, ko kona ni bita te reirei nakon te boki ae Ana Reirei ni Koaua te Baibara ao ni katabwanina riki ana atatai n te Baibara.