Uringia te Koraki Ake n te Onnaoraki
1. Bukin tera bwa a riai ni kawaraki kaara ake n te onnaoraki n taekinaki te rongorongo ae raoiroi nakoia?
1 A a bati aomata aika kaaitara ma kangaangan te kara. (TeMin. 12:1-7) Tabeman kaara a mena n te onnaoraki ike e a kangaanga te roko irouia n uarongorongo man te auti teuana ma teuana. E ngae ngke tao a aikoa konamaki ke a mwamwaninga te koraki aika kara ao tabeman riki ake n te onnaoraki, ma a boni kona n reiakina, n ota ao n tangira Iehova. Tera arora ae ti na kona n tibwaa iai te rongorongo ae raoiroi ae taekan te “kantaninga ae kakukurei” nakoia?—Tito 2:13.
2. Ti na kanga n reitaki ma onnaoraki ibukini kawaraia?
2 Moana Karaoana: A tauraoi n angiin te tai booki n tareboon ibukin taian onnaoraki are ti kona n reitaki iai nakon te onnaoraki n ara aono. E kona te mataniwi ibukin te mwakuri n te ekaretia ni karaoa te babaire ibukia taan uarongorongo aika tau bwa a na kawari onnaoraki nako. E kona ni moanaki te reirei n te Baibara n taai nako ni karaoan raoi te babaire ao n onimakinaki iai Iehova.—TaeRab. 21:5; 1 Ioa. 5:14, 15.
3, 4. (a) Antai ae ti na karekea te kariaia mairouna ibukini kairan te reirei n te Baibara n te kurubu? (b) Ti na kanga ni kabwarabwaraa aron te babaire ibukini kairan te reirei n te Baibara?
3 E boboto aroni moanakin te reirei n te Baibara ma tein te tabo. N auti n aoraki aika bubura ake a mena iai aomata aika bati ao taani mwakuri, e kakawaki kawarani moa te tia ibuobuoki iai ao ni karekea te kariaia bwa ko na taetae ma te aomata are e tararuaa te mwakuri ikanne. E kakawaki naba kabaean te tai ma te tia bwaibwai n auti tabeua ibukia kaara ake a karerekea aia mwane ni kara aika taabo ake a maeka iai tabemani kaara ao taan tabeakinia aika uoman ke teniman.
4 Ni kaineti ma baika a riki akanne, kabwarabwaraa ae ko kukurei n anga am tai ni kaungaia aomata nako ake a kukurei ni wareki ke ni maroroakini rongorongo man te Baibara. Titiraki bwa iai aika tao a kan ira buakon te kurubu ni maroroakina te Baibara ibukin tao 30 te miniti maanna n te wiki. A kona ni kamanenaaki booki aika kakaokoro ma a bati aika noria bwa a tangiraki riki booki aika Karaki Man te Baibara ao Teuare te Kabanea ni Kakannato Mai Buakoia Aomata. Ko kona naba ni kaotii booki nakon te mataniwi. E kona ni karekea te bong, te tai ao te tabo ni maroro ao ni bae ni karinna i buakoni baika a kakaraoaki n te karenta ibukin te onnaoraki anne. Tai maaku ni kaotiko ae ngkoe temanna kaain Ana Tia Kakoaua Iehova. N te tai naba anne, kabwarabwaraa raoi nakon te mataniwi anne bwa e na ataia ae ko aki roko ibukini karaoan te mwakuri n te Aro ma ibukini kairan te reirei n te Baibara.
5. Baikara iango aika a na karika te reirei bwa e na kakukurei ao n uaana?
5 Kairan te Reirei: E boboto arom ni kaira te reirei n te Baibara ni baika riiriki ao te tabo anne, ngaia are ko riai ni bwaina te iangoraoi ao n rabakau ni kaangaraoa am babaire iai. E riai te tia kaira te reirei n uotii katoton te boki are a na kamanena ao ni manga anai n tokin te reirei. E kakawaki naba bwa e na uotii katotoni booki akanne aika bubura mania ni kabatiaa ibukia tabeman. A kona ni warekaki barakirabe, n tabekaki titiraki ao a kona ni kaekaaki titiraki n aron ae ti kakaraoia. A kona n rineaki tabeman aika kukurei ao n tau bwa a na wareki barakirabe ke kiibu man te Baibara. Bwaina te aroaro ae anainano, te akoi ao ni kai kawaraki n tain te reirei. N tabetai, ko kona ni kaota nakoia teuana mai buakon te taamnei man ara botaki are a kona n ibuobuoki ni karikirakea onimakinan te Baibara ke ni katuruturui reirei aika kakawaki man rongorongon te Baibara, ngkana e kariaia te mataniwi n te tabo anne. E riai ni kaukaki ao ni kainaki te reirei n te tataro ae kimototo. A a tia naba tabeman taan uarongorongo ni kabwarabwarai anenen te Tautaeka n Uea.
6. E na kanga ni kanakoraoaki te kauntaeka?
6 Tera arom ngkana e kauntaekaa te baere e warekaki te aomata anne ke n taekinaki n tain te reirei? Kabongana wanawanam ngkana ko kaeka. (IKoro. 4:6.) Tao ko kona ni wareka kibun te Baibara nakoina ae kaineti ma te baere e tabeaianga iai. Ngkana e aki uaana karaoan anne, ngkanne e na raoiroi riki butimwaean ana iango ao tuangnga bwa ko na rinanona ma ngaia imwin te reirei.
7. Tera ae ko kona ni karaoia ngkana e rangi ni kau titiraki kaain te auti n aoraki ke e kaota nanona ni kan ongora?
7 N taai tabetai, e kona n rangi ni kau titiraki kaain te auti n aoraki anne ke ni kaotia bwa e tangiria n reiakina ae bati riki. E kabongana te anga ni maroro aei te tari te aine temanna: “E rangi n tikiraoi am titiraki anne. Ma tataninga teutana bwa n tokin ara reirei, I kona ni maroroakina anne ma ngkoe bwa are bon am titiraki.” N angiin te tai, e rangi n tamaroa riki ngkana ti babairea raoi ara tai n reirei ma aomata aika kan ongora n te tai teuana ao n te tabo ae kaokoro.
8. A na kanga n tauaki mwini karaoan te reirei n te kurubu ao ake a karaoaki naba te reirei ma ngaiia n te Baibara n tatabemania?
8 E rangi n raoiroi riki ngkana a kaira te reirei n te kurubu n te tabo anne taani Kakoaua akanne ni katoatai. A kona taan uarongorongo nako n taua mwin aia tai anne. N te tai are e tia iai te reirei, e na taua mwin anne te tia uarongorongo are kaira te reirei n te kurubu bwa teuana manga okiraia aomata ao temanna te reirei n te Baibara ni katoa namwakaina. E kona naba ni kairaki te reirei n te Baibara n aron anne ma aomata n tatabemania nako ikanne ake a kona n ota ao n reirei.
9, 10. Baikara aroaro aika raraoi ibukia te koraki ake a irekereke n te mwakuri aei? Kabwarabwaraa.
9 Kateimatoa Karaoana: E rangi n raoiroi riki ngkana ti bairea te bong ao te tai ibukini kairan te reirei n te Baibara n te kurubu. A kona ni kantaningaia kaain te onnaoraki ao taani mwakuri bwa ti na waakina anne ni katoatai ao ni moanaki ma n toki n te tai ae baireaki. (Mat. 5:37) Mangaia are e kainnanoaki te kakaonimaki, te botumwaaka ao te babaire raoi. E oti mani baike a tia n riki bwa e raoiroi riki ngkana a uaia ni kaira te reirei n te kurubu taari aika mwaatai. (TeMin. 4:9, 10) A kona ni kainnanoaki riki taan uarongorongo aika bati n taian onnaoraki aika bubura.
10 E rangi ni kakawaki naba kaotiotan te iraorao ao tabeakinaia aomata. (IBir. 2:4) Karekea am tai ni maroro ma aomata ake a roko n tatabemania nako n te moantai are ko roko iai. E kakawaki tauani mwin araia ao n ururingakia imwaini kairan te reirei are imwina. Ma e ngae n anne, a kona kaara tabeman n iangoia bwa a kakeaaki bongaia ngkana ko aki weteia n araia. A kona n namakina te kukurei ao n tangiraki ngkana ko taotaonakinnano ao ko atataiaomata.
11. A na kanga te koraki ake a kaira te reirei n te Baibara n te kurubu ni kaota karineaia taani mwakuri ao aia utu kaara?
11 E rangi ni kakawaki naba bwainan te karinerine ao kaotan te akoi nakoia taani mwakuri ao aia utu kaara aika mena i rarikia n te onnaoraki. Ngkana e a tia te babaire, e riai bwainan te wanawana n aki bita te tai ke te babaire n akea te maroro ma te mataniwi. Titirakina te mataniwi ibukin ana ibuobuoki n aroni waakin te reirei i nanon taai aika kakaokoro nako. Ngkana a roko aia utu kaara akanne ni kawariia n te tai are e waakinaki iai te reirei ao biririmoa ni kamauria. Kabwarabwaraa nakoia bukini karaoan te reirei n te Baibara. Karaua nanoia ni kaotia bwa ko tabeakina kaain aia utu anne. Kaoia bwa a na tekateka ao n ongoraea te reirei n te Baibara.
12, 13. Taekin rongorongo aika kaota kakawakin te uarongorongo nakoia kaara ake a mena n taabo ake a tararuaaki iai.
12 Uaan te Mwakuri: A a tia mataniwi aika mwamwananga ao ekaretia nako n ribootina uaan te mwakuri ae kaunganano ae karaoaki aei. N te rongorongo teuana ao e kaania 20 kaain te tabo anne ake a ongora n te moani maroro. Ikanne are e a kairaki iai te reirei n te Baibara ma onoman kaain te tabo anne n tatabemania nako. N tokina, e a bwabetitoaki temanna mai buakoia. Ni karaoan te reirei n te Baibara n te tabo teuana ao e a kairaki iai temanna te unnaine ae 85 ana ririki bwa e na reitaki ma te ekaretia n ana tabo ao ni kaota nanona ni kani bwabetitoaki. Ngke e a kamatoaaki n te tabo teuana bwa a nang ikotaki baika a kakaraoaki iai ike e a katokaki te reirei n te kurubu are e kairaki irouia Ana Tia Kakoaua Iehova ao a a ngurengure kaain te tabo anne nakon te mataniwi. N tokina, e a manga moanaki te reirei ao imwin anne, a a roroko iai aomata aika 25 nakon 30 mwaitiia.
13 Bon tiaki tii kaain te onnaoraki aika rotaki n te tangira are ti kaotiotia nakoia ma a a bati riki. N te katoto, e boni kangaanga ae a na tekateka n ongora ao n titiraki n te reirei n te Baibara taani mwakuri. A kona naba n riki bwa te bwai ni kaotioti nakoia kaain te kaawa anne ara kakorakora ni kaotiota tabeakinaia te koraki ake n te onnaoraki. (1 Bet. 2:12) E taekina ae kangai temanna te tia kairiri imwin kaongoakina bukin te reirei n te Baibara: “Bukin tera ngkai kam rangi n tabwarabwara? Kam na waaki ningai?” E korea ae kangai te mataniwi riki temanna: “E korakora nanou ni kamoamoaia kaain te kurubu n reirei aei nakoia taani mwakuri n te onnaoraki n te tabo aei. E katauraoaki te mwakuri ae aki kabooaki aei irouia Ana Tia Kakoaua Iehova bwa iteran aia mwakuri ni minita n te aono.” N te tabo teuana ae a tararuaaki iai kaara i Hawaii ao a anganaki Ana Tia Kakoaua Iehova te beeba are a kamoamoaaki iai ibukin aia mwakuri ae raoiroi are a kabwarabwaraaki iai taan anganano bwa te “kakabwaia ae kakawaki” nakoia kaara aika tararuaaki n te tabo anne.
14. Bukin tera bwa ti riai ni karababaa nako ara mwakuri ni buokiia te koraki aika kara n te onnaoraki?
14 A kaoaki naba kaara iroun Iehova bwa a na neboia. (TaiAre.148:12, 13) A nanonaki n te kakao anne te koraki ake a mena n te onnaoraki. Iai kaara aika n te onnaoraki n am aono aika a a tia ni kakabwaiaaki man ongoraean te rongorongo ae raoiroi? Tao ti kona n uarongorongo n te aro ae uaana nakoia te koraki ake n te onnaoraki man aia ibuobuoki unimwaane n te ekaretia n ara aono ao mataniwi n te onnaoraki. Ngkana ti ururingia te koraki aika kara, ti a kakairi iai iroun Iehova.—TaiAre. 71:9, 18.