Nnen Titiraki

◼ Tera ae a riai n reiakinna ataei bwa a aonga n ikawai n te onimaki?

E bati te bae a riai ni karaoia kaaro ni kaikawaia natiia “i nanon ana reirei ni kaetieti Iehova.” (IEbe. 6:4) N te katoto, a noria kaaro bwa bon te kakabwaia rinanoan te kibu ni katoabong ma natiia ni katoa ingabong. N tain te taromauri n utu ao ni bobotaki riki tabeua, a kona utu ni mataku ao ni maroroakini reirei aika kakawaki ae kanoan te kaongora n te viteo ae Young People Ask, ni kaokioki rongorongo man te Baibara ke ni karaoa aia kataneiai iai. Ma e ngae n anne, a riai naba ataei n reiakinaki koaua aika nano man te Baibara bwa a aonga “n eweka te mwaneka n ikawai.”​—Ebera 6:1.

Iangoa te baere ti reiakinna nakoia aomata ake ti kaitiboo ma ngaiia n ara aono. Ni moan rokora ke n okiraia aomata, ti kakorakoraira n angiin te tai ni moana te reirei n te Baibara ni kabongana te boki ae Tera Ana Reirei ni Koaua te Baibara? Imwini banen te boki anne, ti a manga kabongana te boki ae “Kawakiningkami n te Aro ae Kam na Teimatoa n Tangiraki Iai Iroun te Atua.” Bukin tera? E reiakinaki te aomata man te boki ae Ana Reirei te Baibara ni moan reirei ibukin te koaua man te Baibara. N te boki ae “Tangiraki Iroun te Atua,” a reiakinaki iai aomata aroia ni maiuakini booto n reirei man te Baibara i nanoni maiuia. A buokaki aomata aika boou n rinanoan reirei ni booki aikai bwa a na ‘kaneneaki wakaaia’ i nanoni Kristo ao ni “kateimatoaaki n te onimaki.” (IKoro. 2:6, 7) Tiaki a na kakabwaiaaki naba natira n te kaongora aei? A kainnanoa naba reiakinaia taekan te karea ni kaboomwi, te Tautaeka n Uea ao aroia maate. A riai naba ataei n ataa bukina ngkai e aki katoka te rawawata te Atua ao ataakini kabaneani bongin te waaki ae ngkai i aon te aba. A riai ni kakoauaa raoi bwa bon te koaua are a taekinna Ana Tia Kakoaua Iehova. A riai naba rooro n rikirake n atai booto n reirei man te Baibara ao aroia ni “kakabongana aia atatai.” (Ebera 5:14) Ni koauana, a riai kaaro n iangoa aia ririki ao aron aia konabwai natiia. Ma e ngae n anne, a a bati ataei aika iai aia konabwai ni moana reiakinani koaua aika nano man te Baibara, e ngae naba ngkana a rangi n uarereke.​—Ruka 2:42, 46, 47.