Karikirakean Rabakaura n te Mwakuri ni Minita Man Arora ni Katauraoa Ara Moantaeka

Bukini Kakawakina: E kona kaain te auti ni katoka te maroro imwain ae ti uarongorongo nakoina, ngkana e aki kauekea te kan ongora ara moantaeka. Ngaia are a a bati taan uarongorongo aika iangoa raoi aia moantaeka bwa iteran te maroro ae rangi ni kakawaki. E ngae ngkae e katauraoaki aroni kabwarabwaraan te maekatin n Ara Mwakuri ni Minita ao n te boki ae te Reasoning, ma a aki bane n reke iai maroro ibukin te moantaeka ae kona ni bibitaki ni kaangaraoan te maroro. E ngae naba ngkana e ibuobuoki aroni kabwarabwaraan te maekatin, ma a kona taan uarongorongo ni bitii ke ni katauraoi oin aia moantaeka. Ngaia are e na uaana ara mwakuri n uarongorongo ngkana ti katauraoa raoi ara moantaeka, n oneani mwin are ti a taekina naba ae rio n ara iango ngkana e kauka ana mataroa kaain te auti.—TaeRab.15:28.

Aroni Karaoana:

Rinea am reirei ae ko na maroroakinna. E riai ni boto i aon te boki ae ko na anganako, ao e riai ni kauekea kan ongoraeia aomata n am aono.
Katauraoa raoi te moan ao te kauoua n taeka ae ko na taekinna imwin tabekan am taeka ni kamauri ae ko tataneiai iai. Ko kona ni moana am taeka ni kangai: “I kawariko ibukina . . . ,” “A bati aomata aika a tabeaianga ibukin . . . ,” “I kan ataa am iango i aon . . . ,” ke te bwai riki teuana. A nakoraoi riki maroro aika kimototo ao ni kai oota. A rineia tabeman taan uarongorongo bwa a na kamatenikuna aia moantaeka.
Katauraoa te titiraki ni kaotinano are e kona ni kaira kaain te auti bwa e na maroro. (Mat. 17:25) Uringnga bwa e mwaiti te bae e iangoia te aomata anne imwain rokora, ngaia are e na kai oota n ara titiraki are ti tabekia ke e na aki nako nanona iai.

Kataa Aei n te Namwakaina:

Kamwaawa am tai n te taromauri n utu ni katauraoa ao ni kataneiako n am moantaeka.
Tibwaa am maroro are ko na taekinna ma taan uarongorongo ake tabemwaang, n tain te mwakuri ni minita. (TaeRab. 27:17) Bita am moantaeka ngkana e aki anainano.