Kakairi Irouia Burabeti n Aron Otea
1. Tera te titiraki ae ko kona n titirakiniko iai?
1 ‘Baikara angakarea aika I kukurei n angan Iehova?’ Tao ko bae n tia n titirakiniko te titiraki anne ngkana ko kananoa am iango i aon Iehova ibukin raoiroina ae rangi ni bati ao ana nanoanga ae korakora. (TaiAre. 103:2-4; 116:12) E kukurei Otea ni karaoa are e tuangnga Iehova bwa e na karaoia, e ngae ngke e kainnanoaki iai ae e na anga boni ngaia. Ti na kanga ni kakairi iroun Otea?
2. Ti na kanga ni kakairi n ana katoto ae raoiroi Otea ni botumwaaka n te mwakuri n uarongorongo?
2 Uarongorongo n Tain te Kangaanga: E kaonotaki ana rongorongo Otea nakon te tautaeka n uea ni baronga ake tebwina mai meang, ae Iteraera arana, ike e a moanna ni maunanako iai te taromauri ae koaua. E kakaraoa ae buakaka i matan Iehova te Uea ae Ieroboam II, ao n reitaanako taromauriani kaao ataei are e karaoia Ieroboam I. (2Uea 14:23, 24) A teimatoa ueea ake imwina ni kakerikaaka ana onimaki te tautaeka n uea ni baronga aika tebwina ni karokoa kamaunaakina n 740 B.C.E. Ma e ngae n anne, e kakaonimaki Otea ni beku bwa te burabeti tao i nanon 59 te ririki, n aki ongea taabangakin te taromauri ae kewe. Ti motinnanoia naba bwa ti na uarongorongo i nanon ririki aika bati, e ngae ngkana ti kaaitara ma te aki bwerengaki ke te riribai?—2Tim. 4:2.
3. E kanga ni kaikonakaki ana nanoanga Iehova ma maiun Otea?
3 Kaatuua Iangoan Ana Nanoanga Iehova: E tua Iehova nakon Otea bwa e na karekea ‘buuna mai buakon te wewene ni bure.’ (Otea 1:2, BG) E ngae ngke e karika natin Otea te mwaane buuna ae Nei Komera, ma imwina ao neiei e a manga karikiia natina n tamwa aika uoman. Tauraoin Otea ni kabwaraa ana bure buuna, e kaikonakaki iai ana nanoanga ae bati Iehova nakoia tibun Iteraera ake a aki ongeaba, ngkana a rairi nanoia. (Otea 3:1; IRom 9:22-26) Ti kukurei ni mwinibwai baika ti tangiri bwa ti aonga ni kaotiota ana nanoanga Iehova nakoia aomata n aekaia nako?—1Kor. 9:19-23.
4. Baikara angakarea tabeua aika ti kona n angan Iehova?
4 A a tia tabeman ana toro Iehova ni kitan aia mwakuri ae bubura booia iai, bwa a aonga ni kabanea aia tai ae bati n te mwakuri ni minita. A a tia tabemwaang n tiku n aki mare ke n aki kariki ibukini moanibwaian te Tautaeka n Uea. Ngkana ti iaiangoa maiun Otea, ti kona n iangoa aei ibukira, ‘I aki kona ni karaoa are e karaoia.’ Ma ngkana e rikirake ara kakaitau ibukin ana akoi ae rianako Iehova ao n onimakina taamneina ae raoiroi ibukini kakorakoraakira, ti kona ngkanne ni kabonganaaki irouna n aanga ake ti iangoi bwa ti aki kona ni karaoi, n aron naba Otea.—Mat. 19:26; IBir. 2:13.