Arora ni Katauraoi Ara Moantaeka Aika Anainano
1. Tera aroni kakawakin ae e riai n raoiroi ara moantaeka?
1 N aron te amwarake ae rangi ni kangkang ae ko moani kanna ae kaingaingaa nanom nakon te amwarake are ko na manga kanna imwina, ai aron naba te moantaeka ae raoiroi ae karekea te anga ae nakoraoi ni maroroakinan te Baibara. A kona ni kaokoro abwakin ao kanoan ara moantaeka aika anainano, ma e kainnanoaki n taai nako te moantaai n iango ao ni katauraoi n aron te amwarake ae kangkang are e a kaman iangoaki aroni katauraoana. (TaeRab. 15:28) E na kanga n anainano ara moantaeka?
2. Ti na kanga ni katauraoa ara moantaeka ae kakannongora?
2 Rinei Maroro Aika Kakannongora: E riai ni kauekea te kan ongora ara moantaeka, ke e kona ni kairaki iai kaain te auti bwa e na katoka te maroro. Ngaia are ko riai n iangoi baika riki n am aono ni katauraoan am moantaeka. A kan ongoraea taekan te tautaeka ae raoiroi kaain am aono, te maiu n utu ae kakukurei ke katokan te buaka? N angiin te tai, a tangiria aomata ni kaota aia iango, ngaia are katauraoa te titiraki ae kammwakura te iango. Ko kona ni kabongana te katoto teuana mai buakoni moantaeka aika n Ara Mwakuri ni Minita, ao ni kaangaraoia nakoia kaain am aono? E aera ko aki kataneiako n tabetai ma moantaeka tabeua n tain am Taromauri n Utu n te tairiki?
3. Ti na kanga ni kaangaraoa ara moantaeka ni kaineti ma kateia ao anuaia kaain ara aono?
3 Iangoi Kateia ao Anuaia Aomata: N taabo tabeua, ao ti kantaningaaki bwa ti na taekina naba ngkekei bukin rokora. N taabo riki tabeua, e iangoaki bwa bon te aroaro ae aki riai iroun te aomata ae kawara te auti ngkana e aki titiraki moa ni kaineti ma marurungini kaain te auti, ao tao ni karakina rongorongona tabeua. N aono tabeua, e kona n reke angara n taekina te Baibara n ara moantaeka nakoia aomata, ni kaineti ma aia Aaro are a ikawairake iai. (Mwa. 2:14-17) Ma n aono ake a mena iai aomata ake kaain Aaro aika tiaki Kristian ke aomata ake bon akea aia Aro, e kona n nakoraoi riki taekinan te Baibara ni manga okiraia nakon taekinana n te moantai.—Mwa. 17:22-31.
4. Tera ae ti riai n iangoia raoi ibukin ara moantaeka ae ti na taekinna?
4 Te Moantaeka: Katauraoa raoi am moantaeka. A nakoraoi n taai nako taeka aika kimototo ao a bebete. E kakawaki naba arora n tabeka ara moantaeka. Kaota ingaingam ni karaoa anne. Kaotiota te moangare n iraorao ae kaota tabeakinani kaain te auti. Ngkana ti kakairi n aanga n ibuobuoki aikai, ti na buokaki iai ni katauraoi ara moantaeka aika a na kaungai nanoia kaain ara aono bwa a na amwarake man “ana taibora Iehova.”—1Kor. 10:21.