Nnen Titiraki

◼ Imwain ae e katauaki nakon te bwabetito te tia uarongorongo ae tuai ni bwabetitoaki, e na maanra te tai ae riai n roroko iai ni kaei bobotaki ao n uataboa te mwakuri ni minita?

Te bwabetito bon te motinnano ae te kabanea ni kakawaki ae e na karaoia te aomata. Mangaia are imwain ae e katauaki temanna nakon te bwabetito, e riai n tau ana atatai ni kaineti ma baike e tangiri te Atua mairouna. Irarikin anne, e riai ni kamani kaotiota ana motinnano ni maiuakina ae boraoi ma nanon te Atua.

A tuangaki Kristian bwa a na aki kaaka aroia ni bobotaki, bwa e aonga ni waekoa te tia uarongorongo ni kaota botumwaakana ni kaakaei bobotaki n te ekaretia. (Ebera 10:24, 25) E riai naba ni katoatai n anga ana kaeka. Ni koauana, e riai ni kaaina te Kuura ni Kataneiai Ibukia Taan Uarongorongo, e ngae ngke tiaki aei te bwai ae e kainnanoia.

Irarikin anne, kioina ngkai a a tia n anganaki Kristian mwiokoaia bwa a na tataekina te rongorongo ae raoiroi ao ni karekeia taan rimwini Kristo, e riai te tia uarongorongo ae tuai ni bwabetitoaki ni katoatai n uataboa te mwakuri ni minita imwaini bwabetitoana. (Mat. 24:14; 28:19, 20) Iraua te namwakaina ae riai n uarongorongo iai imwaini bwabetitoana? Ni koauana, e riai n anganaki ana tai ae tau ni kaotia bwa e kakaonimaki nakon ana motinnano, ae e na katoatai n uataboa te mwakuri ni minita ma te ingaingannano ni katoa namwakaina. (TaiAre. 78:37) Ma e ngae n anne, e aki kainnanoaki te tai ae maan man te tai are e moana iai ana uarongorongo ni karokoa ae e a katauaki nakon te bwabetito, tao tii i nanon tabeua namwakaina. Mwaitira te tai ae e riai n ribootinna ngkana e irira te mwakuri ni minita? Bon akea tuua aika matoatoa ibukin aei. A riai unimwaanen te ekaretia n iaiangoi aroaron te tia uarongorongo aika kakaokoro, ao ni bwaina te iangoraoi ao te riai n aia babaire.​—Ruka 21:1-4.

A riai unimwaanen te ekaretia (ke tabonibai n te ekaretia ae tii tabeman unimwaane iai) ake a maroro ma te aomata are e na bwabetitoaki, n uringnga ae a kakaokoro aroia aomata nako ao a riai ni bwaina te wanawana ni baireia bwa e a tau nakon te bwabetito te aomata anne ke e tuai. A na bae ni kantaningaia bwa e boni koaua raoi nanona ni kan riki bwa temanna Ana Tia Kakoaua Iehova, ao ni kaotiota ana kakaitau ni kakabwaiaana ngkai e a iraorao ma kaain ana botaki Iehova ao n uataboa te mwakuri ni minita. A a ataia naba unimwaanen te ekaretia bwa e tuai n ikawai n te onimaki te aomata anne, ke n reke irouna rabakaun te tia uarongorongo ae mwaatai are e a tia ni bwabetitoaki. Ngkana a iangoia unimwaanen te ekaretia bwa e tuai tau nakon te bwabetito te aomata are e kani bwabetitoaki, a riai ni bwaina te akoi ni kaota nakoina bukin aia babaire man te Baibara ao ni buokia naba bwa e na karekea buokana ibukin ana onimaki.