Kakairi Irouia Burabeti n Aron Ioera
1. Ti na kanga ni kakairi n nanorinanon Ioera ngkana ti uarongorongo?
1 Antai te burabeti ae Ioera? E kaotia ae boni ngaia “natini Betuera.” (Ioera 1:1, BG) E katuruturua taekan ana rongorongo Iehova te burabeti ae nanorinano aei, ma tiaki taekani mwiokoana ae te tia uarongorongo. N aron anne, n oneani mwin ae ti na ukera kamoamoaara ke kinaakira n ara mwakuri ni minita, ti kairi aia iango aomata nakon Iehova ao te Baibara. (1Kor. 9:16; 2Kor. 3:5) Irarikin anne, ti karekea korakorara n te rongorongo ae ti tataekinna. Baikara iteran nako ana taetae ni burabeti Ioera aika kona n anganira te ingaingannano ao te kantaninga ni boong aikai?
2. Tera ae e riai ni kaungaira bwa ti na karaoia ngkai e a kaan ana bong Iehova?
2 “E a Kaan Ana Bong Iehova.” (Ioera 1:15, BG): E ngae ngke a koreaki rongorongo aikai nga ma nga te ririki n nako, ma ti a maeka ngkai n taini kakoroani bukia. Rikiraken te waaki ae buakaka n te aonnaba ao te aki bwerengaki ma te kakaniko aika ti kaaitarai n ara aono, boni bwaai ni kakoaua bwa ti a maeka ni kabaneani bongin te waaki ae buakaka ae ngkai i aon te aba. (2Tim. 3:1-5; 2Bet. 3:3, 4) Ngkana ti iaiangoa kaanin te toki, iai bukina ae ti na moanibwaia ni maiura ara mwakuri ni minita.—2Bet. 3:11, 12.
3. Bukin tera bwa e kakawaki te mwakuri ni minita, riki ngkai ti a uakaan ma te rawawata ae korakora?
3 “E na Riki Iehova ba Neia Ana Aomata ni Kamaiuia.” (Ioera 3:16, BG): Te taeka ae mwaeiei ae kabwarabwaraaki n te kibu aei, e tii kaineti nakon ana motikitaeka Iehova n tain te rawawata ae korakora. Ti kabebeteaki n ataakin ae Iehova, e na kamaiuia ana toro aika kakaonimaki n te tai anne. (TeKao. 7:9, 14) Ngkai ti uataboa te mwakuri n uarongorongo ao n namakina aron Iehova ni boutokaira ao ni kakorakoraira, ti a karikirakea iai ara onimaki ao nanomwaakara aika a na buokira n rokon te rawawata ae korakora.
4. Ti na kanga ni kimwareirei ao ni kariai taai aika a na roko ma te aki nanokokoraki?
4 E ngae ngke e kabwarabwaraaki ana rongorongo Ioera irouia tabeman bwa teuana mai buakon te bwai ae karawawata, ma e karekea nakoia ana aomata te Atua te kantaninga ae kakukurei ibukin te kamaiuaki. (Ioera 2:32) Ti bia kariai ngkanne taai aika a na roko ma te aki nanokokoraki ao te ingaingannano n tataekina te rongorongo ae raoiroi ibukin ana Tautaeka n Uea te Atua, ngkai ti tou mwin taeka aika koreaki n Ioera 2:23 ae kangai: “Kam na kukurei . . . ma ni kimareirei iroun Iehova ae Atuami.”