Ko Tauraoi ni Karaoi Bitaki?
1. Ibukini bibitakini baika riiriki n te aonnaba, baikara bitaki aika kainnanoaki bwa ti na karaoi?
1 E kabotauaki n te Baibara n 1 I-Korinto 7:31, bwa titeboo te aonnaba aei ma te tabo ni kamataku are a bibitaki iai taiani kamataku ao aekita. Ibukini bibitakini baika riiriki n te aonnaba, e kainnanoaki bwa ti na karaoi bitaki i nanon te tai teuana ma teuana ni kaineti ma ara aanga n uarongorongo, ara babaire ao ara maroro. Ko tauraoi ni karaoi bitaki?
2. Bukin tera ngkai ti riai ni karaoi bitaki bwa ti aonga n teimatoa n irira butin ana botaki Iehova?
2 Am Anga n Uarongorongo: E teimatoa ni karaoaki te bitaki i nanon te ekaretia ni Kristian. N te tai are e moani kanakoia iai taan rimwina Iesu, ao e tuangia bwa a na aki karekea te buua n amwarake ke te mwane n aia bwauti ni mwane. (Mat. 10:9, 10) Ma imwina riki, e a manga bitii kaetieti akanne ibukina bwa e a kaman ataia ae n taai aika a na roko ao a kona taan rimwina ni kaaitara ma te riribai, ao ibukin naba karababaan te mwakuri n uarongorongo n aono ake tabeua. (Ruka 22:36) N te tienture ae e a tibwa nako, ao a kabonganaaki aanga n uarongorongo aika kakaokoro n ana botaki Iehova n aroni beeba aika uarereke ibukini kauringaani kiibu tabeua, kaongora n te rerio, ao tibika aika bubura aika teke i aon taiani kaa ibukin ongoraeakinani kabwarabwara, ni kaineti ma kainnanoaia n te tai anne. Ni boong aikai, kioina ngkai a aki titiku aomata ni mwengaia n aono aika bati, e a riai ni kabatiaaki riki te mwakuri ni minita man te auti teuana ma teuana n ana tabo te botannaomata ao n te tai ae aki baireaki. Ti kaungaaki naba bwa ti na kawara te auti teuana ma teuana n te moan tairiki, ngkana arona bwa a kitani mwengaia aomata n te ngaina n nako ni mwakuri. Kioina ngkai e bibitaki kawain ana kaa ni buaka Iehova, ko teimatoa n irira butina?—Etek. 1:20, 21.
3. Ti na kanga ni buokaki bwa e na uaana ara mwakuri n uarongorongo n ara aono, ngkana ti tauraoi ni karaoi bitaki?
3 Am Maroro: Tera ae a tabeaianga iai kaain am aono? Te mwane? Te utu? Te iowawa? E kakawaki bwa ti na atai kangaanga aika teimatoa n riiriki ao aroaro aika taabangaki n ara aono bwa ti aonga ni katauraoa iai ara maroro. (1Kor. 9:20-23) Ngkana a kaota te bae a tabeaianga iai kaain te auti, e raoiroi riki ngkana ti bita ara maroro nakon te baere a tabeaianga iai, n oneani mwin are ti a anga naba te kaeka ae aki rangi n ibuobuoki ao n reitaanako ara maroro are ti katauraoia.
4. Bukin tera bwa ti riai ni waekoa ni karaoi bitaki?
4 N te tai ae e a rangi ni kaan, e nang roko n tokina “baika riiriki” n te aonnaba aei ao e nang moanaki te rawawata ae korakora. “E a kimototo te tai ngkai.” (1Kor. 7:29) Ai kakawakira ngkanne bwa ti na karaoi bitaki ao n aki iremwe ni karaoa anne, bwa ti aonga ni kakororaoa ae bati i nanon te tai ae kimototo aei!