Tera ae Kairira Bwa Ti na Uarongorongo?
1. Tera irekereken te tangira ao ara mwakuri ni minita?
1 Bon te mwakuri ae te kabanea ni kakawaki ae ti kona ni karaoia ni boong aikai, tataekinan te rongorongo ae raoiroi ibukin Ana Tautaeka n Uea te Atua. Ni koauana, rinanon te mwakuri aei ao ti kaotiota iai ongeabara nakon tuua aika uoua aika rangi ni kakawaki ae tangiran Iehova ao tangiraia aomata. (Mareko 12:29-31) Te tangira bon te mwaaka ae korakora ae kona ni kairira bwa ti na riki bwa minita aika ingainga nanoia.—1 Ioa. 5:3.
2. Ti kanga ni kaotiota tangiran Iehova n ara uarongorongo?
2 Tangiran Iehova: Ti kairaki n tangiran Raoraora ae Iehova bwa ti na tei ibukina. E a tia n uaraoaki iroun Tatan i nanon 6,000 tabun te ririki n nako. (2 Kor. 4:3, 4) Mangaia are a kakoauaa aomata bwa te Atua e kammarakia taani bure n te ai ni moone, boni ngaia te Temanna n teniman ae kamimi, ao e bon aki tabeakinia aomata. A bati aomata ake a iangoia bwa bon akea ngaia. Ai ingaingara nanora ibukia aomata bwa a na ataa te koaua ibukin Tamara are i karawa! E na rangi ni kukurei te Atua ngkana ti botumwaaka ni mwakuri korakora bwa taani kakoaua ibukina, ao e na un iai Tatan.—TaeRab. 27:11; Ebera 13:15, 16.
3. N te aro raa ae kaotaki iai tangiraia aomata n ara mwakuri ni minita?
3 Tangiraia Aomata: Ni katoaa te tai are ti uarongorongo iai nakon temanna, ti kaotiota iai tangirana. E korakora nanoia aomata ni kan ongoraea te rongorongo ae raoiroi n taai aika okoro aikai. A bati aomata aika ai aroia kaain Ninewe ake n ana bong Iona ake a “aki atai ataiia ma maingia.” (Iona 4:11, BG) Ti reiakinia aomata rinanon ara mwakuri ni minita bwa a na ataa aroni karekean te maiu ae kakukurei ao n nakoraoi. (Ita. 48:17-19) E a karekea nakoia te kantaninga. (IRom 15:4) A “na kamaiuaki” ngkana a ongeaba ao ni maiuakini baike a reiakin.—IRom 10:13, 14.
4. Tera ae e na bon aki mwanuokaki iroun Iehova?
4 A aki kaotiota tangiraia aia karo ataei aika ongeaba tii n taai aika baireaki. A kakorakoraia ni bwaina te tangira n taai nako. N aron naba anne, ti kairaki n ara tangira ae korakora ibukin te Atua ao aomata bwa ti na kamatairikira ni kakaaei aanga n uarongorongo n taai nako, tiaki tii n taai aika baireaki ibukin te uarongorongo. Ti na uarongorongo n aki toki. (Mwa. 5:42) E na bon aki mwanuokaki iroun Iehova te aeka n tangira anne.—Ebera 6:10.