Te Reta Mairoun te Rabwata n Tautaeka
Nakoia Taari:
Bon nibwan te tangira Tamara are i karawa ae Iehova. Mangaia are e taekinaki n te Baibara bwa “te Atua bon te tangira.” (1Ioa. 4:8) E ngae ngke Iehova bon Teuare Moan te Mwaaka, ma e aki taekinaki n ana Taeka bwa “te Atua bon te mwaaka.” A boto ana tua i aon te tangira. Ai anaakira nanora irouna!
E kakukurei bwa Iehova e aki kairoroira bwa ti na beku ibukina. Bon tiaki te tia tautaeka ae ribuaka. E tangirira bwa ti na beku irouna ibukin tangirana. Ngkana ti karaoa aei, ti kaotia iai bwa ti tangira ana tautaeka ibukina bwa ti onimakina arona n tautaeka ae eti ao n tatangira. E a kaman teretere aei mani moani karikaia aomata.
E angania Iehova inaomataia Atam ao Ewa n rinea ae a na karaoia, n oneani mwin ae e na kairoroia bwa a na ongeaba irouna. Ngke arona bwa a tangira Iehova ao ni kakaitau n te baere e a tia ni karaoia ibukia, a na bon rawa nakon ana kakorakora Tatan ni kairiia bwa a na karitei.
Imwina riki, e taekina ae kangai Mote n ana kabanea n taetae nakoia tibun Iteraera: “Noria, I katea te maiu [i matami] n te bong aei ma te raoiroi, ao te mate ma te buakaka.” (TuaKau. 30:15, BG) Iai inaomataia aomata n rinea ae a na maiuakinna. N aron naba anne, e taku Iotua nakoia tibun Iteraera: “Ao ngkana e taraa ni buakaka iroumi te toro iroun Iehova, ao kam na rinea n te bong aei ane kam na toro irouna.” A kaeka aomata ao a taku nakon Iotua: “Ti bon aki kona ngaira n iangoa kitanan Iehova.” (Iot. 24:15, 16, NW) Ti namakina naba anne ni boong aikai. Ti aki kona n “iangoa” kitanan Iehova ibukina bwa ti tangiria.
Ngkai Kristian ni koaua ngaira, ti ataa raoi te bae e irekereke ma te inaomata n rinea ae ti na karaoia. E ngae ngke a mwiokoaki unimwaanen te ekaretia bwa a na anga te reirei ni kairiri ao te reirei ni kaetieti, ma a aki uaiakina ae a na tautaekana ke ni kairi maiuia ke aia onimaki tabemwaang. E korea ae kangai te abotoro Bauro: “I aki taekinna bwa taan ueana ami onimaki ngaira, ma raao ni mwakuri ngaira ibukini kimwareireimi, bwa kam teimatoa ngkai ibukina bwa kam onimaki.”—2Kor. 1:24.
Ai karaunanora ngkana ti karaoa te bwai teuana ibukina bwa ti kani karaoia, nakon ae ti kairoroaki bwa ti na karaoia! E kaoira Iehova bwa ti na karaoa ae raoiroi ibukin tangirana. E noraki kakawakin anne n ana taeka Bauro aika kairaki koreaia aikai: “Ngkana I anga au bwai nako ni kaamwarakeia iai tabemwaang, ao ngkana I kaburea rabwatau nakon te mate bwa I aonga ni kamoamoa iai, ma ngkana akea te tangira irou, ao akea manenana nakoiu.”— 1Kor. 13:3.
Ai batira kimwareirein ao neboan Iehova n noraia mirion ma mirion taari mwaane ao aine, ake a toro irouna ibukin tangirana ma nanoia ni koaua!
Ibukin anne, e rangi n tangiriia ana toro ni kabane Iehova n ikotaki ma ngkami ataei ao rooro n rikirake aika kam kaotiota tangirana, n oneani mwin ae kam na tangira ana waaki te aonnaba ma ni katoki oin nanomi iai. A na rau nanomi bwa ti rangi n tangiringkami.—Ruka 12:42, 43.
N te ririki ae nako, ao kam a tia ngkami taari mwaane ao aine, ao rooro n rikirake, ni kabanea te aoa ae 1,748,697,447 n tataekina te rongorongo ae raoiroi ibukin tangiran Iehova. 7,782,346 mwaitiia ake a uataboa te mwakuri ni minita ni katobibia te aonnaba, bwa a kairaki n tangiran Iehova. Ti kimwareirei ni mwaitiia aika boou ae 268,777 ae angiina mai buakoia bon rooro n rikirake ake a kaota katabuani maiuia nakon Iehova rinanoni bwabetitoaia n te ran. E nanonaki n aei bwa 5,168 mwaitiia ake a bwabetitoaki ni katoa wikeen. Ai rotakira nanora n aei!
N tain te toki aei, ao a kaaitara ana aomata te Atua ma kangaanga aika bati, kataaki, bwainikirinaki, te aoraki, ao tabeman a kabokorakora ma kangaanga ni kaineti ma te kara. Ma ti kamatoai nanora bwa ti na aki “kerikaaki” ke ni “bwara nanora.” Ti rangi n tangiringkami ni kabane.—Ebera 10:39; 2Kor. 4:16.
Tarimi,
Te Rabwata n Tautaeka Ibukia Ana Tia Kakoaua Iehova