Tai Iangoia Bwa Ko Aki Kona n Tokanikai n Namakinan ae Ko Aki Tau
1. Bukin tera bwa a tabwarabwara tabeman ni kaira te reirei n te Baibara?
1 Ko tabwarabwara ni kaira te reirei n te Baibara ibukina bwa ko aki onimakina am konabwai ni kaira te reirei ma temanna n te aro ae uaana? N taai tabetai, a namakinna naba ana toro Iehova ake rimoa n aroni Mote ao Ieremia bwa a aki tau nakoni mwiokoaia. (TeOti. 3:10, 11; 4:10; Ier. 1:4-6) Mangaia are a bati aika a namakina naba anne. A na kanga n tokanikai iai?
2. Bukin tera bwa ti riai n aki tii uarongorongo man te auti teuana ma teuana, ao n angania tabemwaang bwa a na kaira te reirei n te Baibara ibukira?
2 Ti riai n ururingnga ae e bon aki kona Iehova n tuangira bwa ti na karaoa te bwai ae riaon ara kona. (TaiAre. 103:14) Ngaia are ti boni kona ni karaoa mwiokoara ae karekeaia ‘taan rimwini Kristo ao reireinaia.’ (Mat. 28:19, 20) A aki tii mwiokoaki iroun Iehova naake a mwaatai i buakora ao n rangi n rabakau. (1 Kor. 1:26, 27) Ngaia are ti riai n aki tii uarongorongo man te auti teuana ma teuana ao n angania tabemwaang bwa a na kaira te reirei n te Baibara ibukira.
3. Tera aron Iehova ni katauira ibukini kairan te reirei n te Baibara?
3 E Katauira Iehova: Bon Iehova ae e katauira bwa ti na karekeia taan rimwini Kristo. (2 Kor. 3:5) E reireinira rinanon ana botaki koaua aika mena n te Baibara, ae a aki ataia angiina aomata aika taiani kabanea ni wanawana n te aonnaba aei. (1 Kor. 2:7, 8) E kawakini ibukira rongorongon ana angareirei aika uaana te Tia Reirei ae Kakannato ae Iesu bwa ti na kakairi iai, ao e teimatoa naba n reireinira rinanon te ekaretia. Irarikin anne, e aki katikuira Iehova i bon iroura bwa ti na karikirakea rabakaura n angareirei man te Baibara. E katauraoi bwaai n ibuobuoki n aron te boki ae Ana Reirei te Baibara ae kabwarabwaraa te koaua n te aro ae baireaki raoi ao e kai oota. E bon aki kangaanga kairan te reirei n te Baibara n aron ae ti iangoia.
4. E aera ngkai ti kakoauaa bwa e na boni buokira Iehova?
4 A kona ni kakororaoa mwiokoaia Mote ao Ieremia man ana ibuobuoki Iehova. (TeOti. 4:11, 12; Ier. 1:7, 8) Ti kona naba ni butiia Iehova bwa e na buokira. Ni koauana, ngkana ti kaira te reirei n te Baibara ma temanna, ti a reireinna iai te koaua ibukin Iehova ae te mwakuri ae kakukurei i matan te Atua. (1 Ioa. 3:22) Ngaia are katea tiam bwa ko na boutokaa kairan te reirei n te Baibara, ae iteran te mwakuri ni minita ae rangi ni kakukurei ao e karekei kakabwaia.