Taiani Bitaki Nakon te Botaki i Nanon te Wiki
N te wiki ae moanaki n Tebetembwa 3, ao e nang raka tain te Reirei n te Baibara n te Ekaretia man 25 te miniti nakon 30 te miniti. N ana moantaeka te tia kaira te reirei, ao e riai ni kabanea teuana te miniti ni kauringa iai te reirei are mai mwaina. E nangi bitaki naba tain te Botaki Ibukin te Uarongorongo, man 35 te miniti nakon 30 te miniti. E nang kakeaaki te tai ae katauraoaki ibukini kaongora. Ma a riai n taekinaki kaongora ngkana e moanaki moan iteran te botaki. N angiin te tai, iai tabeua kaongora aika riai ni katanoataaki, ma e aki riai ni katanoataaki kanoan te botaki nakoia kaain te ekaretia. A aki riai ni manga katanoataaki kaongora ibukin te mwakuri ni minita ao te kaitiaki, n ikotaki naba ma taiani kamauri. (km 10/08 i. 1, bar. 4) Ngkana iai te kaongora ae abwabwaki ae e na katanoataaki, e nakoraoi riki ngkana a moantaai n ataa anne taani kairi reirei n te botaki bwa a aonga ni kauarerekea aia maroro.