Kawakina Am Iango
1. Tera te boto n iango n te runga n aono n te ririki ni mwakuri ae 2013, ao bukin tera ngkai e katauraoaki te botaki aei?
1 E tuangia ana abotoro Iesu bwa a na tangira Iehova ma nanoia ni kabanea, taamneia ao aia iango. (Mat. 22:37, 38) E katauraoaki te bwabwaro, te runga n aono, ao te bong ni botaki ae okoro n te ririki aei, ibukini buokara ni kakorakoraa nanora. E kangai te boto n iango n te bwabwaro, “Kawakina Nanom!” Te boto n iango n te bong ni botaki ae okoro n te ririki ni mwakuri ae 2013, e kangai “Kawakina Mataniwin Nanom.” E na kabwarabwaraaki n te runga n aono ae e na karaoaki n te namwakaina are imwina n te ririki naba anne, te boto n iango ae “Kawakina Am Iango” ae aanaki ni Mataio 22:37. E katauraoaki te runga n aono aei ibukini buokara n tatabemanira nako bwa ti na neneri baika ti iangoi bwa a na kakukureia Iehova.
2. Baikara titiraki aika ti na kakaaei kaekaaia n te runga n aono?
2 Baika A na Kabwarabwaraaki: Ngkana ti ongoraei kabwarabwara n te runga n aono, ti riai ni kakaaei kaekaan titiraki aikai ake a na kabwarabwarai baika kakawaki:
• Ti na kanga n rarawa n iangoi baika a ‘iaiangoi aomata’?
• Ti na kanga ni buokiia te koraki ake a aki onimaki ni baike a kamatakiaki iai nanoia?
• Te iango raa ae ti kani karekea iroura?
• Baikara kakabwaia ngkana ti kananoi ara iango?
• Ti na kanga ni kariaia Iehova bwa e na kaira ara iango?
• A na kanga buu mwaane, buu aine, kaaro ao ataei ni karekea te kakukurei n aia utu?
• Ti na kanga n tauraoi imwain ana bong Iehova?
• Tera ae nanonaki ni katauraoan ao kakorakoraan ara iango nakon te mwakuri?
• Baikara kakabwaia aika a na karekei te koraki ake a maiuakini baike a reiakin?
3. Bukin tera ngkai e kakawaki kaean te runga n aono ae uabong bongina, te kakauongo raoi iai ao maiuakinani baike ti reiakin?
3 E buakanira Tatan bwa e na kabuakakai ara iango. (2Kor. 11:3) Mangaia are ti riai ni kawakina raoi ara iango ibukini kakukureian Iehova. Ti riai naba ni kakairi n ana iango Kristo ao ni buakana ana kariri te waaki ae buakaka i aon te aba. (1Kor. 2:16) Mangaia are karaoi ami babaire ibukini kaean te runga n aono ae uabong bongina. Kakauongo raoi iai. E na buokingkami maiuakinan te reirei ae kakawaki ae e na kabwarabwaraaki, bwa kam na katauraoi ami iango nakon te beku ibukin te Tautaeka n Uea ma te ingaingannano.—1Bet. 1:13.