Kawakina Mataniwin Nanom
1. Tera te boto n iango n te bong ni botaki ae okoro n te ririki ni mwakuri ae 2013, ao bukin tera ngkai e katauraoaki te botaki aei?
1 Ti kaitaraaki ni katoabong ma baika riiriki ake ti a kona iai ni kakeai bongani mataniwin nanora. Anne bukina ae e katauraoaki te boto n iango ae “Kawakina Mataniwin Nanom,” ibukin te bong ni botaki ae okoro n te ririki ni mwakuri ae 2013, ae e na karaoaki moan iterana n Tebetembwa 1, 2012. (1 Tim. 1:19) E katauraoaki te botaki aei ibukini buokara n tatabemanira nako, bwa ti na tuoi raoi arora ni kamanena te bwai n tituaraoi ae kamimi aei mairoun ara tia Karikiriki.
2. Baikara titiraki aika kakawaki aika a na kaekaaki n te bong ni botaki ae okoro?
2 Iaiangoi Raoi Titiraki Aika Kakawaki Aikai: A na kaekaaki n te bong ni botaki ae okoro itua titiraki aika kakawaki aika kaineti ma mataniwin te nano:
• Tera te bwai ae e na karika te kangaanga nakoni mataniwin te nano?
• Ti na kanga ni kataneia raoi mataniwin nanora?
• Ti na kanga n itiaki man raraaia aomata nako?
• Tera ae kaotaki ibukira ngkana ti iaiangoi ao ni maiuakini booto n reirei man te Baibara?
• Ti na kanga n rarawa ni kammarakia aomata ni kaineti ma baika a bairei n oini mataniwin nanoia?
• Rooro n rikirake, kam na kanga n nanomwaaka ngkana kam kairoroaki bwa kam na kakeaa bongani mataniwin nanomi?
• Baikara kakabwaia aika karekei te koraki ake a kakairi ni mataniwin nanoia ae kairaki n te taamnei?
3. Ti na kanga ni buokaki n te bong ni botaki ae okoro aei?
3 N ana ibuobuoki Iehova, ti kona iai ni kaitaraa ana kakorakora Tatan n uruana mataniwin nanora. E tuangira te Atua ae Tamara are i karawa rinanon ana Taeka ao ana botaki, ni kangai: “Aio te kawai, kam na nakonako i nanona.” (Ita. 30:21, BG) Te bong ni botaki ae okoro aei, bon ana aanga teuana Iehova ni katauraoa te kairiri anne. Mangaia are karaoi ami babaire bwa kam na kaea te botaki anne ni kabane. Kakauongo raoi iai ao iaiangoa arom ni maiuakin reirei ake a taekinaki. Maroroakina kanoan te botaki anne n am utu. Ngkana ti maiuakina te reirei are ti karekea, e na boni kakorakoraira ni kateimatoai ‘mataniwin nanora aika raraoi,’ ao e na buokira naba n rarawa nakon ana waaki Tatan ake a na uruana ara iraorao ma Iehova.—1Bet. 3:16.