Tera ‘Bukini Kimwareireim’?
1. Tera bukini kimwareireira ni katoaa banen te namwakaina?
1 Tera ‘bukini kimwareireim’ ngkana e nangi bane te namwakaina, ao a kauringaki aomata nako bwa a na karini aia ribooti ibukin te mwakuri ni minita? (IKar. 6:4) E ngae ngkana special bwaiania ngaira aika ti kabanea 130 te aoa n te mwakuri ni minita ke taan uarongorongo ngaira aika ti kariaiakaki bwa ti na kabanea 15 te miniti, ma ti riai ni bane ni kimwareirei ngkai ti beku iroun Iehova ma nanora ni koaua.—TaiAre. 100:2.
2. Bukin tera bwa ti riai ni kakorakoraira ni beku iroun Iehova?
2 Ti bon tau n angan Iehova ara kabanea n tamaroa, ibukina bwa boni ngaia te Uea ae Moan te Rietata i aoni bwaai ni kabane. (Maraki 1:6) Ibukin tangirana iroura, ti a katabua iai maiura bwa ti na kakaraoa nanona. Mangaia are bon iai bukini kimwareireira n te bong teuana ke ni banen te namwakaina, ngkai ti kakoauaa bwa ti angan Iehova ‘moan uaan’ ara tai, rabakaura, ao korakorara. (TaeRab. 3:9, BG) Ma ngkana e tuangira mataniwin nanora bwa ti kona ni karaoa ae tamaroa riki, ti riai ngkanne n iaiangoa te bwai ae ti na karaoia bwa ti aonga n rikirake.—IRom 2:15.
3. Bukin tera bwa ti aki wanawana ngkana ti kabotauira ma tabemwaang?
3 ‘Tai Kabotauko ma Temanna’: Ti aki wanawana ngkana ti kabotauira ma tabemwaang ngkana e bati riki korakorara. A bibitaki baika riiriki ni maiura ao a kakaokoro ara konabwai. N taai tabetai ngkana ti kabotauira ma tabemwaang, e kona ni karekea te kaiangatoa ke namakinan ae akea bonganaia aomata. (IKar. 5:26; 6:4) E aki kabotaua Iesu ma tabemwaang. Ma e kamoamoaia aomata ni kaineti ma baika a kona ni karaoi.—Mareko 14:6-9.
4. Baikara reireiara aika kakawaki, n ana kaikonaki Iesu ibukin te tarena?
4 N ana kaikonaki Iesu ibukin te tarena, a anganaki aomata n tatabemania nako te tarena “n ai aron nako aia konabwai.” (Mat. 25:15) Ngke e a roko te toka n tuoi mwin aia mwakuri, a karekea kamoamoaaia ao a uaia ni kimwareirei ma te toka te koraki ake a mwakuri korakora ni kaineti ma aia konabwai ao baika riiriki ni maiuia. (Mat. 25:21, 23) N aron anne, ngkai ti teimatoa ni katabetabeira n te mwakuri n uarongorongoa te Tautaeka n Uea, ti aki nanououa bwa ti kona ni karekea akoara iroun te Atua ao ni karekea naba bukini kimwareireira.