Tebwi ma Uoua Bukin te Uarongorongo

Bukin tera ngkai ti tataekina te rongorongo ae raoiroi nakoia aomata ao n reirei ma ngaiia n te Baibara? E kakawaki ibukini buokaia aomata aika raoiroi nanoia bwa a na toua te kawai ae tiki nakon te maiu? (Mat. 7:14) Bon anne bukina ae te moan ae karinanaki i nano, ma tiaki aio bukina ae rangi ni kakawaki riki. N am iango, e nga riki ae kakawaki mai buakoni bukina aika 12 aika karinanaki i nano, ae ti riai n uataboa iai te mwakuri ni minita?

1. N ara uarongorongo, ti buokiia iai aomata bwa a na kamaiuaki.—Ioa. 17:3.

2. A kauringaki iai aomata aika buakaka bwa a na rairi nanoia.—Etek. 3:18, 19.

3. E boutokaaki iai kakororaoan taetae ni burabeti aika n te Baibara.—Mat. 24:14.

4. E kaotiotaki iai raoiroin te Atua. Akea ae kona ni bukina Iehova bwa e aki angania aomata aika buakaka aia tai n rairi nanoia imwaini kamaunaaia.—Mwa. 17:30, 31; 1 Tim. 2:3, 4. 

5. E a reke iai ara tai ni kakororaoi mwiokoara ni buokiia aomata ake a kabooaki n raraan Iesu, ni kaineti ma aia onimaki. —IRom 1:14, 15.

6. Ti a kaitiakaki iai man raraaia aomata nako.—Mwa. 20:26, 27.

7. E kainnanoaki naba te uarongorongo, ibukini kamaiuara.—Etek. 3:19; IRom 10:9, 10.

8. E kaotiotaki iai tangiraia aomata nako.—Mat. 22:39.

9. E kaotiotaki iai te ongeaba iroun Iehova ao Natina.—Mat. 28:19, 20.

10. Bon iteran naba ara taromauri. —Ebera 13:15.

11. Ti kaotiota iai tangiran te Atua.—1 Ioa. 5:3.

12. E boutokaaki iai katabuan aran Iehova.—Ita. 43:10-12; Mat. 6:9.

Ni koauana, tiaki tii aikai bukina ae ti riai n uataboa iai te mwakuri ni minita. N te katoto, e kakorakoraaki ara onimaki n te uarongorongo ao e reke iai ara tai ae kakawaki ae ti a riki bwa raon te Atua ni mwakuri. (1 Kor. 3:9) Ma e kakawaki riki bukina ae te ka-12 ngkai ti uataboa te mwakuri ni minita. E boutokaaki katabuan aran te Atua n ara mwakuri ni minita n aki ongeia bwa a kan ongora iroura aomata ke a aki, ao e kaekaaki naba iai iroun Iehova ana bukibuki teuare e kakanikoa. (TaeRab. 27:11) Ni koauana, iai bukina ae kakawaki bwa ti na ‘tataekina te rongorongo ae raoiroi n aki toki.’—Mwa. 5:42.