Kakabwaiaan te Aba Iroun Iehova, e Kabatiaa te Kaubwai
1 E kaotaki iroun Iesu te bwai ae a riai ni moanibwaia Kristian ni maiuia. (Mat. 6:33) Moanibwaian te tautaeka n uea iroura, boni kaikoan ara bwai nakon taai aika a na roko. Ara tai, korakorara ao kaubwaira ake ti kamanenai ibukini moanibwaian te tautaeka n uea, a kaikoi “baika kakawaki [ibukira] i karawa” ike akea ae e kona n anai. (Mat. 6:20, 21) A aki kona ni kabuaa arara ae raoiroi i matan Iehova, kangaanga ni kaineti ma te mwane ke ruutin te bangke.
2 E kakoauaaki man te rikirake ae ti noria n ara aono, bwa e teimatoa Iehova ni kakabwaiaira. I nanon nimaua te ririki ake a tibwa nako ao ti noria bwa e korakora iai te rikirake. (Ita. 60:22) Tera ae ti kona ni karaoia n tatabemanira nako ibukini karekeani kakabwaia aika bati?
3 Te Mwakuri ni Bwaiania: N aki ongei kangaanga aika tabe n rikirake ni kaineti ma te mwane, ma e tabe naba n rikirake mwaitiia bwaiania. I nanon ririki aika nimaua ake a tibwa nako, ao ai uoua te tai ngkai okiokini mwaitiia regular bwaiania i Biitii ao Kiribati. E aera ko aki titirakina te bwaiania ae mwaatai ke te mataniwi n te aono ae uarereke, buokam bwa ko aonga n riki bwa te bwaiania? Ngkana ko a riki bwa te regular bwaiania, a kona n angaraoi nakoim kakabwaia riki tabeua n aron te Kuura Ibukin te Mwakuri ni Bwaiania, ke te beku bwa te Special Bwaiania ibukin te tai ae uarereke. Imwin tabeua te tai ao ko kona naba ni katauaki bwa ko na kaei reirei ni kataneiai riki tabeua mairoun te Atua, n aron te Kuura n Reirei n te Baibara Ibukia Taari Mwaane Aika Akea Buuia, te Kuura n Reirei n te Baibara Ibukia Taanga ni Kristian ke te Kuura ni Kireata.
4 Katean Taabo n Taromauri: I nanon ririki aika aua ake a tibwa nako, ao a a tia ni kateaki ruaiwa Taabo n Taromauri aika boou ao uoua Taabo n Taromauri aika a onobwaiaki. A taekinna te koraki ake a a tia n anga nanoia ni mwakuri ni kateitei aikai, bwa bon aei te mwakuri ae te kabanea ni kakukurei irouia mai buakoni mwakuri ake a a tia ni karaoi. A a kona n reiakin rabakau aika kakawaki n aia tai ni kateitei ao ni mwakuri ma tabeman. E aera ko aki butiia unimwaane n te ekaretia te booma ibukini Katean Taabo n Taromauri?
5 Te Mwakuri n te Betaera: Ni waakinakon te tai, a na bae ni manga kainnanoaki riki taan ibuobuoki n te Betaera ao n Aobiti n Raitaeka i Kiribati ao Tuvalu. Ngkana iai ae e kainnanoaki bwa e na ibuobuoki, ao a na moan anaaki bwaiania aika mwakuri korakora ao n ingainga nanoia. A kona n rikirake riki n te onimaki ao ni kabatiaaki riki aia tai ni beku n ana botaki Iehova, rinanoni bobotaki ni Kristian riki tabeua ao reirei ni kataneiai aika okoro n te Betaera. E aera ko aki maroroakina te mwakuri aei ma te mataniwi n te aono ae uarereke?
6 Te Aono ae Aki Mwiokoaki Iai te Ekaretia: E a tibwa karairaki nakon ana abamwakoro imwin 23 te ririki temanna te tari te aine ae te bwaiania i Kiribati ma raona ni bwaiania, ao e rangi n rotaki nanona n norakia aika bati ake a kukurei ni butimwaea te rongorongo. Ko kona ngkoe ma am utu ni kabongana ami tai ni motirawa n uarongorongo n te aono ae aki mwiokoaki iai te ekaretia, ibukin teuana te wiki ke e raka riki? Maroroakinna ma te unimwaane n am ekaretia ngkana ko kan uataboa te mwakuri aei.
7 Te Uarongorongo n Taabo Ake E Rangi ni Kainnanoaki Iai te Ibuobuoki: E reireinira Iesu bwa ti na tataro ibukini kabatiaaia taan ibuobuoki ibukin te mwakuri n tai, ma ko kona ngkoe ma am utu n riki bwa kaekaan te tataro anne? (Mat. 9:37,38) Ko kona ni kabebetea aroni maium ao ni mwaing nakon taabo ake e rangi ni kainnanoaki iai te ibuobuoki? E aera ko aki maroroakina aei ma te mataniwi n te aono ae uarereke, ao n titirakinna ngkana iai taabo n am aono ake e rangi ni kainnanoaki iai te ibuobuoki?
8 Te Taetae ae Tiaki Oin Am Taetae: N ruon te taamnei ae raoiroi ni Bentekota 33 C.E. ao te moanibwai ae kakororaoia boni buokaia taari bwa a na taetae n tiaki oin aia taetae, ibukini kabutanakoan te rongorongo ae raoiroi. Ni boong aikai ao Iehova e anga taamneina ae raoiroi nakoia te koraki aika kakorakoraia n reiakina te taetae ae tiaki oin aia taetae, bwa a aonga n uarongorongo nakoia te koraki aika kaokoro aia taetae. I nanon nimaua te ririki ake a tibwa nako, ao a a tia n tei aua ekaretia ao uoua kurubu ibukia naake a kabongana te taetae n Inria ae te Hindi, teuana riki te ekaretia n Rotuma ae kateaki i Suva, ao iai naba kurubu aika boou ibukia te koraki aika reiakina te taetae n te bai (Auslan Sign language) ao te taetae n Tiaina. A bati ake a reiakina te taetae n te bai (Auslan Sign language) i Tuvalu, bwa a aonga n uarongorongo nakoia ake a bonotaninga. Ko kona ngkoe n reiakina te taetae ae tiaki oin am taetae ibukini kabutanakoan te rongorongo ae raoiroi?
9 Karekei Kakabwaia: E teretere bwa bon aei te tai ae e a kamani baireia Iehova bwa e na kakorakoraaki riki iai te uarongorongo i Biitii, Kiribati, Tuvalu ao Nauru. A kairaki ana aomata n taamneina ae raoiroi ae mwaaka bwa a na anga boni ngaiia ma kukurein nanoia. Te koraki ake a karaoa anne, a nora koauan ana taeka Iesu ae kangai, “E kakukurei riki te anga nakon te anganaki.” (Mwa. 20:35) E kainnanoaki iai bwa ti na tauraoi n anga boni ngaira. Ma ti kukurei ni kabanei korakorara ibukini karekean te kakabwaia mairoun Iehova? (KBwaai 32:24-26) Tera ae ko na karaoia? Ti bia motinnanoa ae kangai n tatabemanira nako, “Aio ngai; kanakoai.” (Ita. 6:8, BG) Ngkana ti karaoa aei, ti na riki iai bwa aomata aika bati kaubwaia i aon te aba.