Kaineta Raoi te Bae Ko na Oreia
1. Tera irekereken 1 I-Korinto 9:26 ma te mwakuri ni minita?
1 E korea ae kangai te abotoro Bauro: “Arou ni biribiri, tiaki n aron ae e aki ataaki mwina, ao I itau tiaki n aron ae I orea te ea.” (1Kor. 9:26) E taekinna Bauro bwa e kaatuua riki ana iango n uaiakinan tiana ae kabatiaan ana beku ibukin Iehova. Ma a kaineti naba taeka aikai nakon te mwakuri ni minita. Ti riai ni kaineta raoi te bae ti na ‘oreia’ ke ni kamanenai raoi korakorara, bwa e aonga n uaana ara mwakuri. N te aro raa?
2. Ti na kanga ni katotonga Bauro ma taan tataekina te rongorongo ae raoiroi ake n te moan tienture, n rinean taai ao taabo ake a na uarongorongo iai?
2 Kawari Taabo Aika Mena Iai Aomata: A uarongorongo Bauro ma taan tataekina te rongorongo ae raoiroi ake n te moan tienture, n taabo ake iai aomata iai. (Mwa. 5:42; 16:13; 17:17) Mangaia are ngkana a okiri mwengaia n te bwakantaai angiia aomata n ara aono, anne te tai ae angaraoi n te uarongorongo man te auti teuana ma teuana. E koaua bwa a bati aomata aika tataningaa te bwati ke baoia ni mwakuri i rarikin te kawai, n te moaningabong imwain te mwakuri ke n te bwakantaai imwin te mwakuri? N ningai taai ake a mwaiti iai aomata n taabo ni boobwai? Tao e na bati riki te kan ongora ngkana ko uarongorongo i rarikin te kawai n taai akanne.
3. Ti na kanga ni kaineta raoi te bae ti na oreia ni mwakurian ara aono?
3 Bwaina te Wanawana ni Mwakurian Ara Aono: E riai bwainan te iangoraoi ni mwakurian ara aono bwa ti aonga ni kaineta raoi te bae ti na oreia. N te katoto, n oneani mwini kairan te kurubu ae mwaiti kaaina n te aono teuana, are e kainnanoaki iai te tai ao te kakorakora ae bati ni bairean te kurubu bwa a na karaoa raoi aia mwakuri, tao e na nakoraoi riki ngkana a tibwatibwaaki kaain te kurubu. N aron anne, ni karaoan aono aika raroa, e na moantaai ni bane te aono anne ao e na bati riki ara tai ni maroro ma aomata ngkana a karako kaain te kurubu. Ti kona ni karekea ara mwabe ae kaan ma mwengara, ni kauarerekean te tai ae kainnanoaki ibukini kaean te aono teuana?
4. Tera ae na buokira n riki bwa ‘taan akawa aika kokona aika konaia aomata’?
4 E kabotauia taan tataekina te rongorongo ae raoiroi Iesu ma ‘taan akawa aika konaia aomata.’ (Mareko 1:17) Tian te tia akawa bwa e na karekeia konana iika, ma tiaki tii te nako ni beibeti i taari. Ngaia are a kaei taabo ao taai are a na reke iai konaia aika bati taan akawa aika kokona, ao a bon akawa naba n akea aia kabanetai. Eng, a boni kamanena raoi korakoraia. Ti bia kaotiota naba te aeka ni kakorakora anne n ara mwakuri ni minita.—Ebera 6:11.